भांगरभूंय | प्रतिनिधी
पणजी: गोंय पर्यटन विकास म्हामंडळान (जीटीडीसी) आयतार 13 जुलय दिसा सत्तरी म्हालांतल्या चरावणें हांगा मॉन्सून ट्रेकिंग मोहिमेचें आयोजन केलां. गोंयच्या भितरल्या सुवातांतलो मॉन्सून परतून जिवो करीत आशिल्ल्यान चरावण्यां वचपी मार्ग ट्रेकर्सांक गोंयांतलो सगल्यांत सैमीक आनी जैवविवीध प्रदेशां पैकीं एकूच अणभव दितलो.
वट्ट 8 किलोमिटर अंतराचेर पातळिल्लो, चरावणें ट्रेक सैमीक सौंदर्य आनी साहसाचें मिश्रण दिता. हो मार्ग पाचवें रान, व्हांवपी झरे आनी विवीध भूंय प्रदेशांतल्यान वता. हातूंत चडटी- देंवती आनी निसरट फातराळ पॅच हांचो आस्पाव आसा. उडपी फुलपाखे आनी शेंवण्यांच्या गजबज हाचे पसून ते शारी आवाजान स्पर्श न जाल्ल्या चित्तथरारक रमणीय प्रदेशा मेरेन, ट्रेकर्स हांगा सैमाचें संपूर्ण वैभव पळोवपाची अपेक्षा करूंक शकतात. ह्या आव्हानात्मक ट्रेक सैममोगी, फोटोग्राफी उत्साही आनी साहसी प्रेमीं खातीर परिपूर्ण आसा. ही ट्रेक कार्यावळ रानां खातें, गोंय सरकार आनी गोंय रानां विकास म्हामंडळ हांच्या पालवान आयोजीत केल्या.
जीटीडीसीन येरादारी सुरळीत जावची म्हूण गोंयच्या विवीध वाठारांतल्यान येरादारीची वेवस्था केल्या. बशी मडगांव रेसिडेन्सी आनी म्हापशें रेसिडेन्सी हांगा सावन सकाळीं 8.30 वरांचेर सुट्टल्यो. ह्या मार्गार पिक-अप पॉयट्सांत वेर्णें हांगा बिर्ला जंक्शन, कुठ्ठाळी, पर्वरी, बाणास्तारी आनी होंडा हांचो आस्पाव आसा.
हे मोहिमे खातीर नोंदणी शुल्क दरेक मनशाक 1400 रुपया आसा. हातूंत कराचो आस्पाव आसा. ह्या खर्चांत येरादारी, नाश्टो, दनपारचें जेवण आनी पुराय ट्रेकांत गटा बरोबर येवपी प्रशिक्षीत वेवसायीक सैम गायडाच्या सेवेचो आस्पाव आसा.
इत्सुकांनी ह्या अणभवाचो फायदो घेवपा खातीर पावसाचे कपडे, बदलपा खातीर कपडे, ट्रेकिंग शूज, स्नॅक्स आनी दुर्बीण घेवपाचो सल्लो दिला. ट्रेका वेळार धुम्रपान आनी मद्यपानाक सक्त मनाय आसा. शारिरीक नदरेन अशक्त आशिल्ल्यां खातीर ह्या ट्रेकाची शिफारस केल्ली ना. कारण कांय सुवातांचेर उंचाय आनी निसरट भूंय भाग आसा.
सगल्या सैममोगी आनी साहसमोगींनी ह्या मॉन्सून ट्रेकिंग अणभवाचो भाग जावपा खातीर गोंयच्या दर्यादेगे पलतडी आशिल्ल्या शांत, पाचव्या सैमाचो अणभव घेवपा खातीर जीटीडीसी तुमकां आमंत्रीत करता.
बुकिंग आनी अदीक म्हायती खातीर इत्सूक व्यक्ती अनील दलाल हांचे कडेन 9422057704 वा 8379022215 क्रमांकाचेर संपर्क सादूंक शकतात. www.goa-tourism.com ह्या अधिकृत वॅबसायटी वरवीं ऑनलायन बुकिंग लेगीत करूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
