भांगरभूंय | प्रतिनिधी
तिसऱ्या वित्त आयोगा वतीन बसकेंत चर्चा
भांगरभूंय । प्रतिनिधी
वाळपयः ठाणे पंचायतींतल्या चरावणें वाठारांत धरण बांदलें जाल्यार पंचायत वाठारांतल्या सगळ्या गांवांक फावोश्या प्रमाणांत उदक मेळटलें. ताका लागून ह्या प्रकल्पाची येवजण चालीक लावचे खातीर सरकारान यत्न करचे, अशी मागणी तिसऱ्या वित्त आयोगा वतीन ठाणेच्या पंचांचे हाजिरेंत आयोजीत केल्ले बसकेंत केली.
पंचायत कार्यालयांत आयोजीत केल्ले बसकेक राज्याच्या वित्त आयोगाचे संचालक दौलत हवालदार, सरपंच सरिता गांवकार, पंच निलेश परवार, विनायक गांवस, तनया गांवकार, सुरेश आयकार, अनुष्का गांवस, सुभाष गावडे, संचिथा गांवकार आनी सोनिया गांवकार तशेंच सत्तरी म्हालाचे गटविकास अधिकारी सुर्याजीराव राणे, पंचायत सचीव सर्वेश गांवकार, कर्मचारी उत्तर गांवकार आनी हेर मानेस्त हाजीर आशिल्ले.
पंचायत वाठारांतलो उदकाचो उणाव पयस करपा खातीर चरावणें धरण प्रकल्प म्हत्वाचो आसा. तो चालीक लावचे खातीर थळावी आमदार डॉ. दिव्या राणे आनी मंत्री विश्वजीत राणे विशेश यत्न करतात. थंयचेय स्थितींत हो प्रकल्प चालीक लावचो, अशी मागणी हाजीर आशिल्ल्या पंच वांगड्यांनी केली. चरावणे धरण प्रकल्प सुरू जालो जाल्यार जमनी पोंदच्या उदकाची पातळी वाडटली आनी ताचो बरो परिणाम शेती- बागायतींचेर जातलो. तेचवरी शिंपणावळी खातीर खूब प्रमाणांत उदक मेळटलें, अशें तांणी सांगलें. ठाणे पंचायत उदरगतीचे बाबतींत फुडें आसा. वेगवेगळे प्रकल्प ह्या वाठारांत चालीक लागल्यात. फुडारांत आनीक प्रकल्प ह्या पंचायत वाठारांत आयले जाल्यार गांवगिऱ्या वाठाराचे उदरगतीक चालना मेळटली. हे संबंदांत वित्त आयोगा वतीन जाता तितली मजत करतले, अशें उतर हवालदार हांणी दिलें.
जमनी नाशिल्ल्यान कोयर प्रकल्प आडावला
उच्च न्यायालयाच्या निर्देशा प्रमाण दरेका पंचायत वाठारांत कोयराचो विलो लावचे खातीर प्रकल्प उबारतले. मात सत्तरी म्हालांत खूबशा पंचायत वाठारांत जमनीची मालकी मेळा नाशिल्ल्यान हो प्रकल्प आडावला. ठाणे पंचायती कडेन गरजेचो निधी आसा, मात जमनीची मालकी अजून मेरेन मेळूंक ना. हे संबंदांत कागदपत्र सोपस्कार खूब खेपे जिल्होधिकाऱ्या कडेन केल्यात. जमनीची मालकी मेळूंक नाशिल्ल्यान कोयर प्रकल्प आडावला, अशें पंचायत सचीव सर्वेश गांवकार हांणी सांगलें.
सुर्ला पर्यटन उदरगत रोजगारा खातीर फायद्याची
थळावी आमदार डॉ. दिव्या राणे हांणी सुर्ला वाठारांत पर्यटन प्रकल्प उबारपा खातीर यत्न सुरू केल्यात. ताका लागून फुडारांत ह्या वाठारांतल्या बेरोजगारांक रोजगाराची संद मेळटली. तशेंच पंचायतीच्या महसुलांत वाड जातली. ताका लागून हो प्रकल्प जाता तितले बेगीन चालीक लावचो, अशी मागणी पंच वांगड्यांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
