भांगरभूंय | प्रतिनिधी
निसर्गांतल्यो तरेकवार घडणुको कश्यो घडटात हाची जाप सोदून काडपाक पुर्विल्ल्या तेंपार ज्ञान उणें पडटालें. तरी आपले कुवती प्रमाणे त्या काळांतल्या बुदवंतांनी तांच्या फाटल्यो जापो सोदपाचे यत्न चालू दवरले. पूण, ज्ञान आनी फावो ते तंत्रज्ञान नाशिल्ल्यान तांकां हार मानची पडली आनी थंयच चमत्काराचो जल्म जालो. ज्ञानाचे मर्यादेंतल्यान चुकीच्यो समजुती निर्माण जावप हें अजाप न्हय. पूण, ज्ञानाचो विकास जाता तश्यो ह्यो चुकीच्यो समजुती पयस जावपाक फावो आशिल्ल्यो. मात, पिळग्यांन पिळग्यो समाज ह्याच चुकीच्या समजुतींत घुस्पूवन उरला. आधुनीक म्हणपी समाज चमत्कारांक आपल्या जिवितांत स्थान दिता, ही मोठी खंतीची गजाल. 21 व्या शेंकड्यांतलो सगल्यांत व्हड चमत्कार म्हणजे लोक चमत्कार मानतात. ताच्या परस व्हड चमत्कार म्हणजे शिकिल्ले लोकय चमत्कारांचेर विस्वास दवरतात, तांच्या मदीं विज्ञानांचे विद्वान उणें नात, हो चमत्कार न्हय तर समाजाची अधोगती आसा.
चमत्कार हे संकल्पने फाटलो अर्थ समजून घेवया. विज्ञान तत्वां प्रमाण सैमांत दरएके घडणुके फाटल्यान कारण आसूंक जाय. कारणा बगर खंयचीय घटना घडूं शकना आनी तें कारण समजून घेवप, हेंच तर विचारी मनशाचें काम आसा. समजा : पोरसांत भोंवतना तुमच्या खांदार नाल्ल पडलो. पूण तो तुमचेरुच पडचो ही कोणाची इत्सा नाशिल्ली. देंट सुकलो म्हणून तो पडलो. ही नविदाद न्हय. हें सैमीक क्रिये प्रमाणे घडत आसता. योगायोगान तुमी सकयल पावले म्हणून हे घडणुकीचेर तुमी विचार करपाक लागले. पूण म्हज्यार खांदार कित्याक पडलो? त्या फाटल्यान दैवी शक्तीचो राग आसा, असो समज करता आनी अशा तर्कहीन विचारांतल्यान अंधश्रद्धांचो उगम जाता. चमत्कार हो अंधश्रद्धेचोच एक प्रकार मानपाक जाय. जशें अंधश्रद्धेक विज्ञानीक पालव नासता, तसोच चमत्कारांक विज्ञानीक आदार ना. जगात चमत्कार नासतात. प्रत्येक घडणुकी फाटल्यान विज्ञानीक कारण आसता, अशें विज्ञानाचें मुखेल तत्व आसा. हें कारण सोदून काडप प्रत्येक सुशिक्षीत मनशाचें कर्तव्य, अशें आमी मानून घेवपाक जाय.
आतां मेरेन जे चमत्कार आमी मानतात. ते चडशें कथीत रुपांत वो कथा- पुराण अश्या लिखीत रुपांतल्यांन आयल्यात. चमत्कारां फाटली भूमिका अ- विज्ञानीक तर आसाच. पूण ती कितली विश्वसनीय आसा? त्या फाटल्या मुद्दांचो विचार करुया.
सगल्यांत पयली गजाल म्हणल्यार, संतानी समाज प्रबोधन आनी परिवर्तन अश्या समाज सेवेच्या कामा खातीर आपलें जिवित ओपलें. आयच्या बाबा, बुवा भशेन तांका प्रसिद्धीचें वलय लावपाची गरज पडली ना. अभंग, प्रवचन, लोकसंगीत वो हेर माध्यमांच्या आदारान तांणी समाजसेवेचे व्रत हातीं घेतलें. तांकां चमत्कार करपाची गरज कित्याक पडची? त्या खातीर ह्या कथीत चमत्कारां विशीं दुबाव येता. इतलेंच न्हय फाटल्या शेंकड्यांतले संत गाडगेमहाराज सत्यनारायणांतल्या कथांचेर आपल्या किर्तनांन टिका करी. सत्यनारायण घालून बुडिल्ली बोट वयर येता अश्या भाकड कथांचेर विश्वास दवरप म्हणजे मुर्खपण आसा, अशें ते शेंकड्यांनी लोकां मुखार म्हणी. दुर्दैवान तांच्याच फाटल्यान चमत्कारांच्यो काण्यो रचल्यो. इतलेंच न्हय तर ताच्या फुडें वचून, तांच्या जयंती दिसा सत्यनारायणाची पुजा करतात.
दुसरी गजाल, जे चमत्कार म्हणून मानतात त्यो घडणुको सरळ सैमीक नेमाच्या आड वतात. देखीक: उदकाचेर पणट्यो पेटोवप, वणत चलप, उदका वयल्यान चलप, बुडिल्ली बोट पुजा करून वयर येवप, खीर घावन गर्भ वाडप, हवेंत उफेवप, स्वर्गांतल्यान विमान येवप.. आदी चमत्कार म्हणून मानिल्ल्यो घडणूको विज्ञानाक आव्हान दितात. पूण विज्ञान सैमांतले नेम सोदून काडटा, सैमाच्या आड वचना हें मतींत धरपाक जाय.
चमत्कारांविशीं दुबाव घेवपाचो आनीक एक मुद्दो म्हणजे ज्या संतांनी चमत्कारांचेर बडी मारली- संत तुकारामान तर अंधश्रद्धा आनी चमत्कारांचेर सरळ विरोध केलो. दुर्दैवाने तांच्या फाटल्यान चमत्कार जोडले. त्या वयल्यान चमत्कारां फाटल्यान एक वायट डाव आसूं येता.
संतांनी मुखेल करून समाजीक परिवर्तन घडोवपाचेर भर दिलो. हेंच त्या तेंपा वयल्या सोंशण करपी समाजीक घटकांच्या आड वतालें. समाजाचेर शेक दवरपी कर्मठ लोकांनी त्या खातीर तांच्या समाज परिवर्ताच्या कामाक कश्यो आडमेळी हाडल्यो. तांकां कशे तरेन त्रास दिले, तांकां गांवा भायर दवरून ज्या तरेन तांचे हाल केले, त्या खातीर खंयचोय मानवतावादी समाज माफ करपाक ना. तेन्ना दुबळ्या सोंशीत वर्गाची दिकाभूल करपाक आनी आपल्या वटेन सहानुभुती मिळोवपाक अशे तरेन चमत्कार रचून संत लोकांच्या चरित्रांत घुसयल्यान अशें म्हणूं येता. त्या खातीर पिडीत लोक संतांचे परिवर्तनाचें काम विसरले आनी तांकां दैवत म्हणून माथ्यार बसयले. समाजाचेर शेक दवरपी लोकांचें जुस्त सादलें. आतां मेरेन ह्या वर्गान सोंशण वेवस्थेच्या आड येवपी खंयच्याय आंदोलनाक तोंड वयर काडपाक दिलें ना आनी दर खेपे तांकां येस मेळ्ळां.
सद्या बुवा बाबांचे जें प्रस्थ वाडत चल्लां तें हेच समाज वेवस्थेचो एक वांटो आसा. हें आतांच सुरू जालां अशें न्हय तर परंपरा म्हणून हें चलत आयलां. पूण आतां हे वेवस्थेक सरकारी फाटबळ मेळपाक लागलां. समाजाच्या प्रगतीक हें खूब वायट थारतलें, असो भंय जाला.
चमत्कार आनी धर्म हांचें मदलें नातें कितें आसा हें सांगप कठीण जाता. हिंदू धर्मांत प्रत्येक पुण्य पुरूशाचें चरित्र्य फकत चमत्कारांनी भरिल्ले आसता. तांतून त्या महात्माच्या कार्याचो उल्लेख दिसून येना. क्रिस्तांव धर्मांत चमत्कारांक तर पवित्र मानलां. सांतपण मेळटलें जाल्यार चमत्कारांचें बंधन आसा. मदर तेरेझान मनीसपणा खातीर जें काम केलां तें चमत्कारा परस व्हड आसा. तेन्ना तिच्या कार्या फाटल्यान चमत्कार रचप हें तिच्या कामाचें मोल उणें करप जाता.
दुर्दैवान भारतीय समाजाक चमत्काराची ही कीड 21 शेंकड्यांत पसून सतायता. अज्ञान, गरिबी, असुरक्षितताय, अश्या संकश्टांतल्यान वाट चलची पडटा. असहाय्य अवस्थेक लागून तांका असो मार्ग धरचो पडटा हें समजून घेवपाक जाता. पूण सुशिक्षीत, गिरेस्त आनी अर्थीक नदरेन सुरक्षीत समाज अश्या समजुतींक बळी पडटा, होच विज्ञानीक युगांतलो व्हड चमत्कार आसा.
विज्ञानदूत श्रीकांत शंभू नागवेंकार
9096512359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
