चन संस्कृताय रुजपाची गरज

भांगरभूंय | प्रतिनिधी

आयज वाचन प्रेरणा दीस. ते  निमतान वाचनाच्या म्हत्वाचेर उजवाड घालपी लेख.

आयज 15 ऑक्टोबर. हो भारताचे आदले राष्ट्रपती, मिसायल मॅन डॉ. ए पी जे अब्दुल कलाम हांचो वाडदीस. वाचन आनी बरोवपाची आवड आशिल्ल्या डॉ. कलाम हांचे यादीन हो दीस मनयतात.देशांतले सगले जाण सकारात्मक विचार करून स्वताक समृद्ध कसो करतलो आनी ताचे वरवीं देश म्हासत्ता कसलो जातलो, असोच विचार डाॅ. कलाम करताले. 1996 वर्सा ‘इंडिया 2020’ हें पुस्तक  तांणी बरयलें. ह्या पुस्तकाचेर आदारून तेन्नाच्या नियोजन आयोगान व्हिजन 2020 तयार केल्लें. डॉ. कलामान अग्नीपथ नांवाचें इंग्लीश आपजीण बरयल्या. तांणी वट्ट 24 पुस्तकां बरयल्यांत, तातूंतलीं चडशीं विद्यार्थी आनी शिक्षकां खातीर आसात. विद्यार्थ्यांनी जाय तितलीं पुस्तकां वाचून आपलें गिन्यान घटमूट करचें असो तांचो आग्रो आशिल्लो. फकत वाचन केल्यार मनीस समृद्ध जाता अशें ताचें मत आशिल्लें. हे खातीर ते सदांच सांगताले की भुरग्यांक ल्हान पिरायेचेर वाचपाचो मोग लावचो.

आयज वाचन प्रेरणा दीस म्हूण मनोवपाचें मुखेल कारण म्हणल्यार विद्यार्थ्यांचें उणें जाल्लें वाचन. आयच्या मोबायल, इंटरनॅट आनी सोशल मिडियाच्या काळांत तें उणें जायत आसा. आदल्या काळांत विद्यार्थ्यांक अभ्यासक्रमा भायलीं पुस्तकां वाचपाची आवड आशिल्ली, ती आयच्या विद्यार्थ्यां मदीं दिसना. कारण मनोरंजन, ज्ञान मेळोवपाचीं हेर साधनां तांकां मेळ्ळ्यांत. विद्यार्थ्यां मदीं अवांतर वाचनाची रुच उणी जाल्या. आदीं वाचनालयांनी गर्दी आसता. आतां थंय फक्त जाण्टेच आनी वाचनाची आवड आशिल्लेच दिसतात. वाचनालयांतलीं पुस्तकां एकाच जाग्यार धुल्ल खायत पडिल्लीं आसतात. साहित्य संमेलनांनी पुस्तकांची विक्री उणी जावंक लागल्या.

आयचे पिळगेक सोशल मिडियाचें वेसन आशिल्ल्यान ती पुस्तकां पासून पयस वचत आसा. सोशल मिडियाचेर घुरयेक लागून विद्यार्थी अवांतर वाचन विसरला. सोशल मिडियाक लागून वाचन संस्कृताय ना जावपाक लागल्या. ती तिगोवन दवरपाक आनी विद्यार्थ्यां मदीं वाचनाचो मोग रुजोवपाक शाळा आनी म्हाविद्यालयांनी हो दीस मनयतात. ह्या दिसा विद्यार्थ्यांक वाचपा खातीर पुस्तकां दितात. वाचल्ल्या पुस्तकांचेर भासाभास जाता. वेगवेगळे कार्यक्रम, परिसंवाद, प्रशिक्षण आयोजीत करतात. वाचनाची संस्कृताय वाडोवपाक दरेकल्यान आपल्या इश्टांक आनी नात्यांतल्यांक पुस्तक भेट दिवची. खास करून 10 वर्सा सकयल्या भुरग्याक. आयच्या दिसा सगल्यांनी एक पुस्तक तरी वाचूंक जाय.

वाचन प्रेरणा दीस हो एक तोखणायेचो उपक्रम. आयच्या काळांत गिन्यान ही एक बळिश्ट शक्त, हें आमी विसरून गेल्यात. वाचनांतल्यान आमी इतिहासाचें गिन्यान, वर्तमानकाळाची जाणविकाय आनी फुडाराचो वेध घेवपाक शकतात. गिन्यान मेळोवपाचें सगळ्यांत प्रभावी साधन म्हणल्यार वाचन. सतत वाचून आमची ग्रहण तांक आनी स्मृती शक्त बळिश्ट जाता. बुद्धीय खोल वता. हाका लागून मनशाच्या विचार पातळेची सर्वांगीण उदरगत जाता. 

मनशाचें व्यक्तिमत्व घडोवपाचो एकूच मार्ग म्हणल्यार वाचन. वाचन मनशाक सुसंस्कृत जाता. जेन्ना आमी बरें वाचतात आनी बरें आयकतात तेन्ना आमचे विचार प्रगल्भ आनी पेजाद जातात. हाका लागून आमच्यो भावना शुद्ध जातात. आमची भास आनी उलोवपाची शैली विकसीत जाता. वाचन आमचें व्यक्तिमत्व फुलयता. वाचन ही जिणेक उंचायेचेर व्हरपी गजाल, ती बुद्धीची लागवड करता. मनशाचें जिवीत फुलपाक वाचनाचो व्हड वांटो आसता. देखून वाचनाचो छंद वाडोवन आमी आमचें जिवीत समृद्ध करपाक जाय.

मना वयलो ताण उणो करपाक आमी पुस्तकांचो सांगात घेवपाक जाय. बऱ्या पुस्तकांचो आनी विचारांचो आमच्या जिविताचेर सकारात्मक परिणाम जाता आनी जिणे विशीं आमची नदर बदलता. इतिहासीक पुस्तकां वाचप्यांच्या मनांत देशभक्ती निर्माण करता. कथा आनी कादंबरी वाचून वाचप्यांच्या मनांत मनीसपणाची भावना जागृत जाता. कविता वाचल्यार आमच्या मनांत संवेदनशीलताय निर्माण जाता. व्हड मनशांचीं चरित्रां वाचून आमकां प्रेरणा मेळटा. दिसाळीं वाचल्यार समाजीक जागृताय निर्माण जाता. नोकरेचे मुलाखतीक बरें पडटा. पुस्तकां दुबळ्या मनाक बळ दितात, देखून निरशेणेच्या फोंडांत आडखळून पडपी मनीस खून आनी आत्महत्या करपाचें टाळटा. आयच्या भुरग्यांचेर खूब ताण पडला. हो ताण उणो करपाचें वाचन हें एक प्रभावी साधन.

एकूणच वाचन मनशाक सगळ्या गुणांनी समृद्ध करता आनी तातूंत नैतिकता रुजयता. आयज वाचनाच्या उणावाक लागून समाजांतलीं नैतीक मुल्यां शेणत आसात, देखून नव्या पिळगेक परत एक फावट वाचन संस्कृताये कडेन वचप ही काळाची गरज. आमच्या आनी समाजाच्या बऱ्या खातीर वाचनाची संस्कृताय तिगोवन दवरची पडटली. वाचल्यार वांचतले, मागीर तरणाटे पिळगेक वांचोवपाची आसल्यार तातूंत वाचपाची संस्कृताय रुजोवंक जाय. हाचे खातीर वाचन प्रेरणा दीस सारकिले उपक्रम नक्कीच उपेगी पडटले.

श्याम ठाणेदार 

99225 46295