भांगरभूंय | प्रतिनिधी
पणजी ः शेअर ट्रेडिंग वरवीं चड पयशे मेळोवन दिवपाचे हांयस दाखोवन बेतकी- खांडोळेंतल्या एकल्याक 2.44 कोटी रुपयांची तोपी घाली. ह्या प्रकरणांत सायबर विभागान अनवळखी व्हॉट्सअॅप मोबायल वापरप्यां आड गुन्यांव दाखल करुन तपास सुरु केलां.
मेळिल्ले म्हायती प्रमाण, बेतकी – खंडोळेंच्या रुद्रेश सखरदांडे हांणी ह्या प्रकरणांत कागाळ केल्या. ते प्रमाण 25 नोव्हेंबर 2024 ते 7 जानेवारी 2025 ह्या काळांत एका अनवळखी मनशान वेगवेगळ्या व्हॉट्सअॅप मोबायल नंबर, फेसबूक आनी हेर सोशल मिडिया वरवीं ताचे कडेन संपर्क सादलो. तशेंच शेअर ट्रेडिंगांत पयशे गुंतयल्यार चड पयशे मेळोवन दिवपाचे हांयस दाखयले. हे खातीर कागाळदाराक फेसबूक सारक्या सोशल मिडियाच्यो लिंक धाडून तातूंत वांटो घेवपाक लायलो. उपरांत ताका शेअर ट्रेडिंग अॅप डावनलोड करपाक लायलो. त्या अॅपा वरवीं कागाळदाराक सुमार 2 कोटी 44 लाख 59 हजार 408 रुपया वेगवेगळ्या बँक खात्यांत जमा करपाक लायले. कांय वेळा उपरांत संबंदीत अॅपांतलें कागाळदाराचें खातें ब्लॉक केलें. तेन्ना फटवणूक जाता हें कळटकच कागाळदारान सायबर विभागांत सुमार 2 कोटी 44 लाख 59 हजार 408 रुपयांची फटवणूक जाल्ल्याची कागाळ दाखल केली.
अनवळखी मोबायल फोन वापरप्यां आड गुन्यांव नोंद
कागाळीची दखल घेवन सायबर विभागाचे पुलीस अधीक्षक राहुल गुप्ता हांच्या फुडारपणा खाला निरीक्षक दीपक पेडणेकार हांणी अनवळखी व्हॉट्सअॅप मोबायल वापरप्यां आड भारतीय न्याय संहितेच्या कलम 318 (4), 319 (2) आरडब्ल्यू 3 (5) आनी म्हायती आनी तंत्रज्ञान कायद्याच्या कलम 66 ‘डी’ खाला गुन्यांव नोंद करुन फुडली चवकशी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
