भांगरभूंय | प्रतिनिधी
विदेश मंत्री जयशंकर हांची पाकिस्तानाक शिटकावणी
खबरां संस्था
नवी दिल्ली : भारत आनी पाकिस्तान हांचे मदीं तणाव आसा. भारतान पाकिस्तानाच्या 9 आतंकवादी तळांचेर हल्लो केलो. आतां ऑपरेशन सिंदूर उपरांत विदेश मंत्री एस. जयशंकराचें विधान उजवाडाक आयलां. तांणी म्हणलां, पाकिस्ताना वांगडा तणाव वाडोवपी मातूय इत्सा ना, पूण चड करश्यात जाल्यार ओगी रावचे नात. देशाचेर सैन्य हल्ले जायत जाल्यार ताची खर जाप दितले.
जयशंकर हांणी बिरेस्तारा इराणचे विदेश मंत्री अब्बास अर्घ हांचे वांगडा बसका घेतली, त्या वेळार हें विधान केलें. तांणी सांगलें, पहलगामांत अमानूश आतंकवादी हल्ल्यान भारताक बुधवारा शिमे पलतडचे आतंकवादी तळांचेर हल्लो करपाक विवश केले.
एस. जयशंकर हांणी सांगलें, इराणाक सध्याची स्थिती सारकी खबर आसप हें शेजारी आनी लागींचे भागिदार म्हूण म्हत्वाचें आसा.
भारत आनी पाकिस्तान हांचे मदी वाडट्या तणावाचे फाटभुंयेर इराणी विदेश मंत्री अब्बास अर्घ बुधवारा रातीं आपले नियोजीत भोंवडेर नवी दिल्ली पावल्यात. तांची ही भोंवडी भारत आनी इराण हांचे मदले संबंद आनीक घटमूट करतली. भारत भोंवडेर येवचे आदीं कांय दिसां आदीं अर्घ पाकिस्तान भोंवडेर गेल्ले. ऑगस्ट 2024 त सोंपूत घेतले उपरांत तांची ही पयली भारत भोंवडी आसा. भारत हे खेपे आतंकवादा आड निर्णायक झूज झुजता. पयलीं पहलगाम हल्लो आनी उपरांत जापेंत दिल्ल्या ऑपरेशन सिंदूर विशीं लेगीत विदेश मंत्र्यां वरवीं साबार देशांच्या राजदूतांक म्हायती दिल्या. ते भायर अमेरिका, फ्रान्स ह्या सारकिल्ल्य संयुक्त राष्ट्रांचे स्थायी वांगडी देशांकूय भारतान आपल्या ऑपरेशनाची म्हायती दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
