भांगरभूंय | प्रतिनिधी
चेन्नई, खबरां संस्था: श्रीलंकेंत विध्वंस केल्या उपरांत आयतारा तमिळनाडू आनी पुडुचेरी दर्यादेगेर ‘दितवाह’ चक्रीवादळ येवपाचें आसा. कुड्डालोर, नागपट्टिनम, मयिलादुथुराई, विल्लुपुरम, चेंगलपट्टू अश्या जायत्या वाठारांनी वादळा वांगडाच व्हड प्रमाणांत पावस पडपाची शिटकावणी हवामान खात्यान दिल्या.
एनडीआरएफ आनी एसडीआरएफ सयत २८ परस चड आपत्कालीन प्रतिसाद पंगड तमिळनाडूच्या दर्यादेगेवेल्या जिल्ह्यांनी आदार आनी बचाव कार्या खातीर खातीर तैनात केल्यांत. ते भायर महाराष्ट्र आनी गुजरातांतल्या एनडीआरएफ तळांतल्यान १० पंगड चेन्नय पावल्यात.
तमिळनाडूंत व्हड पावसाक लागून शेनवारा ५४ विमानां रद्द जाल्लीं. पुडुचेरी सेंट्रल युनिव्हर्सिटीन ह्या चक्रीवादळाक लागून सुटी जाहीर करून सगळ्यो परिक्षा फुडें धुकलल्या. पुद्दुचेरी, कराईकल, माहे आनी यनमांतल्यो सगळ्यो शाळा आनी म्हाविद्यालयां सोमारा मेरेन बंद उरतल्यो.
श्रीलंकेंत ‘दितवाह’ जाल्ल्यान हुंवार आनी पालसणां कोसळिलल्यान १५३ परस चड लोकांक मरण आयलां. १५० परस चड लोक बेपत्ता आसात. चेन्नयची विमान सेवा रद्द जाल्ल्यान फाटले तीन दीस कोलंबो विमानतळार सुमार ३०० भारतीय प्रवासी आडकून पडल्यात. हे सगले प्रवासी दुबयच्यान श्रीलंकेच्या मार्गान भारतांत येवपाचे आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
