भांगरभूंय | प्रतिनिधी
पणजी ः गोवा शिपयार्ड लिमिटेडांत 25 एप्रिलाक सकाळीं 8 वरांचेर चक्रीवादळाक लागून जावपी आपत्ती वेवस्थापन करपा खातीर राज्य पांवड्यावेली मॉक ड्रिल आयोजीत केल्ली. ह्या मोक ड्रिल खातीर मुरगांव तालुक्याचे मामलेदार प्रविणजय पंडित हांची इन्सिडेंट कमांडर म्हूण नेमणूक जाल्ली.
मोक ड्रिलांत एक कल्पित परिस्थिती निर्माण केल्ली, जातूंत चक्रीवादळाक लागून गोंय शिपयार्डांतली मुखेल मुळावी बांदावळ कोसळ्ळी आनी 26 कामगार आडखले. अशे परिस्थितींत स्टँडर्ड एसओपींत थारायिल्ल्या सुचोवण्यांचेर आदारून गोंय शिपयार्डाच्या अधिकाऱ्यांनी मुरगांव तालुक्यांतल्या मामेलदार कार्यालयाच्या नियंत्रण कक्षा कडेन संपर्क सादलो आनी मजतीची विनंती केली. ते प्रमाण मामलेदार प्रविणजय पंडित हांणी रोखडोच बचाव पंगडाक सक्रिय केलो. एनडीआरएफ, लश्करी, सीआयएसएफ आनी उजो पालोवपी दळाचे अधिकारी थंय पावलें आनी मजत कार्य सुरू केले. शिपबिल्डिंग सामानाच्या राशी खाला आडखून पडिल्ल्या सगल्या 26 कामगारांक बचाव पंगडांनी सुरक्षीतपणान भायर काडले.
हातूंतले दोन कामगार गंभीर जखमी जाले. रोखडेच तांकां एम्ब्युलन्सांतल्यान उपचारा खातीर चिखली उपजिल्लो हॉस्पिटलांत व्हेले. उरिल्ल्या 24 कामगारांक पयल्या उपचारा उपरांत गोंय शिपयार्डांतल्या वैजकी केंद्रांत व्हेले आनी उपरांत तांकां रिलीफ कॅम्पांत व्हेले. ह्या मॉक ड्रिलांत चक्रीवादळा सारकिल्ल्या सैमीक संकश्टां वेळार रोखडोच प्रतिसाद आनी समन्वय कुशळटाय वाडोवपाचेर भर दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
