भांगरभूंय | प्रतिनिधी
अमेरिकेंतल्या विस्कॉन्सिन-मॅडिसन विद्यापिठाचो अभ्यास
वाॅशिंग्टन, खबरां संस्था ः आमी मळबांत पळयतात तो चंद्र कलाकार, कवी, गणितज्ञ, खगोलशास्त्रज्ञ आनी भुरग्यांचो दशकां सावन आवडीचो. पूण एका निरीक्षणा प्रमाण, आतां हो चंद्र ल्हवू ल्हवू धर्तरे पसून पयस वता अशें दिसून आयलां. चंद्र वर्साक 3.8 सेंमी ह्या वेगान धर्तरे पसून पयस वता. हें अशेंत कायम उरलें जाल्यार आमचे धर्तरेचेर दीस 24 वरां बदला 25 वरांचो जातलो असो दावो ह्या अभ्यासांत केलां. धर्तरेचेर एक दीस 18 वरांचो आशिल्लो, असोय एक काळ जावन गेलो असोय दावो संशोधकांनी केला.
विस्कॉन्सिन-मॅडिसन विद्यापिठाचो अभ्यास
अमेरिकेंतल्या विस्कॉन्सिन-मॅडिसन विद्यापिठाच्या पंगडान चंद्राचेर खोलायेन अभ्यास केला. ह्या विद्यापिठाचो प्राध्यापक स्टीफन मेयर्स हांणी सांगलें, जसो जसो चंद्र पयस वता तसो तसो ताचो परिणाम धर्तरेचेर जाला. चंद्र पयस वचप हें नवें न्हय. अशेच तरेच्यो घडणुको जायत्या शेंकड्यां आदीं घडल्यो. चंद्र धर्तरे सावन पयस गेल्ल्यान हजारांनी वर्सां पयलीं 18 वरांचो आशिल्लो दीस 24 वरांचो जालो. आतां ह्या अभ्यासा प्रमाण हो दीस 25 वरांचो जाव शकता.
चंद्राच्या पुराय अभ्यासा उपरांतचें निरिक्षण
विद्यापिठान चंद्राचो खूब खोलायेन अभ्यास केला. तशेंच मळबांतल्या उपगिऱ्यांतल्यान आयिल्ल्यो नोंदी तपासल्यो, तशेंच आदीं सावन आशिल्ल्या धर्तरे वयल्या दोंगर आनी खडपांचोय अभ्यास केलो. आनी चंद्र धर्त रेसावन पयस वता असो निश्कर्श ताचे वयल्यान काडलो. सद्या धर्तरी स्वता भोंवतणी घुंवता जाका 24 वरां लागता. ताका लागून धर्तरेचेर एक दीस 24 वरांचो आसा. पूण फुडाराक हो दीस 25 वरांचो जाव शकता आनी अशें जालें जाल्यार 365 दिसांच्या वर्सा बदला उण्या दिसांचे वर्स आसूं शकता असो दावो अभ्यास अहवालांत केला.
तर 350 दिसांचें वर्स?
विद्यापिठाच्या मतान, धर्तरेचेर एक दीस 25 वरांचो जालो जाल्यार ताचो परिणाम कालगणनेचेर जातलो. सद्या धर्तरेचेर 365 दिसांचें एक वर्स आसा. 365 दीस म्हळ्यार धर्तरेक सुर्या भोंवतणी घुंवपाक लागपी वेळ. धर्तरेचेर एक दीस 25 वरांचो जालो जाल्यार 365 दिसांच्या वर्सा बदला 350 दिसांचे वर्स आसतलें. कारण धर्तरी सुर्या भोंवतणी घुंवप 350 दिसांनी पुराय करतली. चंद्र धर्तरे सावन पयस वचपाक 20 कोटी वर्सां लागतलीं अशेंय ह्या संशोधकांनी अभ्यासांत सांगलां.
चंद्राक लागून धर्तरेची गती मंद जाता. ताका लागून हें अशें घडटा. सद्या चंद्र वर्साक देड इंच वा 3.8 सेंमी पयस वता, अशेंय ह्या अभ्यासांत सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
