भांगरभूंय | प्रतिनिधी
केपें: पर्वत पाड्डें केप्यां 8 चंद्रेश्वर भूतनाथ देवळांतली फंडपेटी फोडून सुमार 10 हजार रुपयांची चोरी जाल्या. देवळाचे उजवे वटेंतलें दार फोडून चोर देवळांत घुसले. ह्याच देवळांत कांय वर्सां आदीं अशीच चोरी जाल्ली.
केपें वाठारांतल्या फामाद देवळां मदलें एक म्हणल्यार श्री चंद्रेश्वर भूतनाथ देवूळ. सोमारा सकाळीं 7 वरांच्या सुमाराक पुरयत देवळांत आयलो तेन्ना देवळांत चोरी जाल्ल्याचें उजवाडाक आयलें. दर दिसा सांजे वेळार आरती जाले उपरांत पुरयत सांजेच्या 6 वरांच्या सुमाराक देवळ बंद करता. तशेंच रातच्या वेळार राखणे खातीर थळावे दोन सुरक्षा रक्षकूय देवळा वतीन नेमल्यात. पूण सुरक्षा रक्षक त्या दिसा कामार वचूंक नाशिल्ल्यान ही चोरी जाल्ल्याचो अदमास पुलिसांनी उक्तायला.
ह्या चोरी प्रकरणांत दोग जाणांचो हात आशिल्ल्याचो दुबाव आसा. रातच्या वेळार देवळा लागसार कोणूच नाशिल्ल्याचो फायदो घेवन ते देवळांत घुसले आनी फंडपेटी देवळा भायर हाडून ती फोडली. उपरांत तातूंतले पयशे घेवन ते थंयच्यान पळून गेले.
चोरांनी सुमार 10 हजार रुपयांची चोरी केल्ल्याचो अदमास पुलिसांनी उक्तायला. कारण 8 दिसां आदींच फंडपेटयेंतले पयशे देवस्थाना वतीन काडिल्ले. चोरयेचो सोद घेवचे खातीर सीसीटीव्ही फुटेजीची मजत घेतात. वास काडपी सुण्यांचो पंगड, ठसे तज्ञ हांचीय मजत घेतात. ह्या प्रकरणांत केपेंचे पुलीस निरिक्षक दीपक पेडणेंकार हांच्या मार्गदर्शना खाला फुडलो तपास केपें पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
