भांगरभूंय | प्रतिनिधी
अंदूंच्या राष्ट्रीय शिक्षक पुरस्कारांत तांचो आस्पाव
काणकोण: माशेंच्या सत्यवती सोयरू आंगले उच्च माध्यमीक विद्यालयाच्यो ज्येश्ठ शिक्षिका चंद्रलेखा मेस्त्री हांकां अंदूंचो राष्ट्रीय शिक्षक पुरस्कार फावो जाला. देशांतल्या 50 शिक्षकां मदीं तांचो आस्पाव आसा. सद्या सत्यवती सोयरू आंगले उच्च माध्यमीक विद्यालयांत काम करपी चंद्रलेखा मेस्त्री हांणी हाचे पयलीं निराकार विद्यालयांत खूबशीं वर्सां अध्यापनाचें काम केलां. विवीध उपक्रम आनी नाविन्यपूर्ण शिक्षण दानाक लागून त्यो विद्यार्थीप्रीय शिक्षिका आसात. तांचे निवडी खातीर श्रीनिराकार शिक्षण संस्थेचे अध्यक्ष प्रशांत नायक, तेच प्रमाण म्हालांतल्या हेर शिक्षण संस्थांनी तशेंच काणकोणचे आमदार आनी सभापती रमेश तवडकार हांणी चंद्रलेख मेस्त्री हांकां पुरस्कार फावो जाल्ले खातीर अभिनंदन केलें.
हो पुरस्कार 5 सप्टेंबराक नवी दिल्लींतल्या विज्ञान भवनांत भेटयतलेे. मेस्त्री हांणी 21 वर्सा आपल्या शिक्षण मळार बरी कामगिरी केल्या. हाचे पयलीं तांकां गोंय राज्य पांवड्यार 16 इनामां फावो जाल्यांत. राज्य पांवड्यार तांकां 2021 वर्सा शिक्षक पुरस्कार फावो जाल्लो.
तांच्या मार्गदर्शना खाला 19 विज्ञान प्रोजेक्टांक राज्य पांवड्यार इनामां फावो जाल्यांत. जाल्यार 14 प्रोजेक्टांक राष्ट्रीय पांवड्या खातीर निवड जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
