भांगरभूंय | प्रतिनिधी
नवी दिल्ली, खबरां संस्थाः येत्या 7 सप्टेंबराक जावपी चंद्रग्रहण हे खेपे तांबड्या रंगात दिसतलें. भारतांतय हें ग्रहण दिसतलें. रातच्या 8:58 वरांचेर ग्रहण सुरू जातले आनी ग्रहण पुराय रातच्या 11 वरांचेर जातले. हातूंत चंद्र तांबडो दिसतलो, ताका ब्लड मून अशें म्हण्टात.
सूर्य, धर्तरी आनी चंद्र सरळ रेशेंत येतकच हें ग्रहण जाता. भारता सयत जायत्या देशांनी हें ग्रहण दिसतलें. वर्साचें हें दुसरें चंद्रग्रहण जे हे खेपे तांबड्या रंगान दिसतलें.
हे चंद्रग्रहण खाशेलें आसतलें. भाद्रपद म्हयन्याच्या पुनवे दिसा हें चंद्रग्रहण जातलें. ह्या दिसा सावन पितृपक्षाचीय सुरवात जातली. ग्रहणाच्या वेळार चंद्र तांबडो आनी केसरी रंगाचो आसतलो. भारतीय वेळा प्रमाण हें ग्रहण 7 सप्टेंबराक रातच्या 8:58 वरांचेर सावळे सयत सुरू जातलें आनी चंद्राचेर रातच्या 9:58 वरांचेर दिसतलें. रातच्या 11 वरांचेर चंद्र ग्रहण पुराय जातलें.
ह्या वेळार चंद्र धर्तरेचे सावळेन पुरायपणान व्यापिल्लो आसतलो आनी तांबड्या रंगान रंगयल्लो खूब सोबीत दिसतलो. तांबड्या रंगाक लागून ताका ब्लड मून अशें नांव दिलां. चंद्रग्रहणाक लागून सूर्य, धर्तरी आनी चंद्र सरळ रेशेंत येतात. ह्या काळांत सुर्याचो उजवाड धर्तरेच्या वातावरणांतल्यान वता आनी तो निळो उजवाड फिल्टर करुन तांबड्या रंगांत रुपांतरीत करता आनी चंद्र तांबडो वा केसरी रंगाचो जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
