भांगरभूंय | प्रतिनिधी
बोर्ड ऑफ वॅटरन्स क्रिकेट इन इंडियान (बीव्हीसीआय) आयोजीत केल्ली अखील भारतीय डबल विकेट क्रिकेट सर्त गोंयचे चंद्रकांत घाडी आनी धीरज नार्वेंकार हे जोडयेन जिखली. ह्या दोगांयनी सर्तींत गोवा वॅटरन्स क्रिकेट संघटनेचें प्रतिनिधित्व केल्लें. हे जोडयेक 50 हजाराचें इनाम आनी करंड फावो जालो.
सर्तीचें आयोजन उत्तर प्रदेशांतल्या गाझियाबादांत केल्लें. सर्तींत देशांतल्या 96 वॅटरन्स क्रिकेट खेळगड्यांनी वांटो घेतिल्लो. फायनलींत चंद्रकांत-धीरज जोडयेन चंदीगडाचे जोडयेक 14 धांवड्यांनी हारयलो. गोंयचे जोडयेन पयलीं बॅटींग करतना निर्धारीत तीन ओव्हरींनी 1 विकेट वगडावन 27 धांवड्यो केल्यो. ते एकदा बाद जाल्ल्यान तांच्यो आठ धांवड्यो कापल्यो. ते उपरांत ह्या दोगांयनी चंदीगडाचे जोडयेक तीन ओव्हरींनी 2 बाद 21 धांवड्यांचेर आडायली. दोन खेपे बाद जाल्ल्यान तांच्या 16 धांवड्यो कापल्यो.
ते पयलीं लीग लडतींनी चंद्रकांत घाडी आनी धीरज नार्वेंकार हे जोडयेन गुजरात, महाराष्ट्र आनी विदर्भ पंगडाक हारोवन उप उपांत्यपुर्व फेरयेंत सुवात मेळयली. उप उपांत्यपुर्व फेरयेंत गोंयान विदर्भाक हारोवन उपांत्यपुर्व फेरयेंत सुवात मेळयली. उपांत्यपुर्व फेरयेंत गोंयान येजमान उत्तर प्रदेशाक हारयलो आनी सुपर-सिक्सांत प्रवेश मेळयलो.
सुपर सिक्सांत स पंगडांक दोन गटांनी विभागून घाले. पयले लडतींत गोंय पंगडान चंदीगडाक हारयलो. उपरांत गोंयान राजस्थानाक हारयलो. उपांत्य फेरयेंत गोंयान विदर्भाक हारयलो आनी फायनलींत सुवात मेळयली.
चंद्रकांत घाडी आनी धीरज नार्वेंकारान अखील भारतीय पांवड्याचेर डबल विकेट क्रिकेट सर्त जिखिल्ले खातीर गोवा वॅटरन्स क्रिकेट असोसिएशनाचे अध्यक्ष तशेंच भारतीय वॅटरन्स क्रिकेट असोसिशनाचे उपाध्यक्ष बाळू फडके हांणी परबीं भेटयली.
सप्टेंबरांत देहरादूनांत वॅटरन्साची आयपीएल क्रिकेट सर्त जातली. हे खातीर स फ्रॅंचायजीन आतां मेरेन आपलो सहभाग निश्चीत केला. सर्तींत वांटो घेवपाक गोंयांतले किमान स वॅटरन्स क्रिकेट खेळगड्यांक संद मेळटली अशें बाळू फडके हांणी म्हणलें. वॅटरन्स आयपीएल क्रिकेट सर्त ही आयपीएल क्रिकेट सर्ती भशेन जातली आनी वॅटरन्स खेळगड्यांची पावणी जातली अशें फडके हांणी मुखार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
