चँपियन्स ट्रॉफी : ‘मिनी वर्ल्ड कप’

भांगरभूंय | प्रतिनिधी

आयसीसी सर्तींत न्युझिलॅण्ड सदांच ‘डार्क हॉर्स’ आसता. सगल्यांक फाटी उडोवन नॉक आवट स्टेजींत पावपाचो तांचो इतिहास आसा. भारताक आयसीसी सर्तींत ते सदांच नडटात.

आयसीसी चँपियन्स ट्रॉफी वन डे क्रिकेट सर्त 19 फेब्रुवारी सावन सुरू जाता. चँपियन्स ट्रॉफीक क्रिकेट जाणकार नॉकआवट सर्त, मिनी वर्ल्ड कप अशेंय म्हण्टात. 1998 त ही सर्त सुरू जाल्ली. तेन्ना सावन तिका वर्ल्ड कपा इतलोच दर्जो दितात. क्रिकेट मळा वयल्या अव्वल 8 पंगडां मदीं ही सर्त रंगता. अंदू पाकिस्तान आनी युएईंत ही सर्त जाता.
सुरवातीक ही सर्त दोन वर्सांनी एकदा खेळयताले. टी- 20 क्रिकेट वर्ल्ड कप, वन डे कप, टॅस्ट चँपियनशीप ह्या सगळ्यांचे आंखणेंत ही सर्त 2 वर्सांत एकदा खेळोवप शक्य ना म्हूण आतां 4 वर्सान एकदां जाता. फाटली सर्त 2017 जाल्ली. मदीं 2021त कोरोनाचे अरिश्टाक लागून सर्तीक ब्रेक लागिल्लो. आतां 8 वर्सांनी ती जाता. ही सर्त जिखप म्हणल्यार आयसीसी ट्रॉफी आपल्या देशांत व्हरप. देखून जिखपा खातीर आठूय देशांनी, खरें म्हणल्यार 5 देशांनी वेगवेगळे प्रयोग केल्यात. हे प्रयोग करतना कांय मॅची व्हगडायल्यात. मात, चँपियन्स ट्रॉफी सर्तींत पुराय ताकदीन देंवपाची तयारी सगल्याच पंगडांनी केल्या.
1998 त उक्तावणाची सर्त दक्षीण आफ्रिकेन जिखिल्ली. 2000 वर्सा न्युझिलॅण्ड, 2004 त वॅस्ट इंडीज, 2006 आनी 2009 ची सर्त ऑस्ट्रेलियेन जिखिल्ली. 2013 त भारत जैतिवंत जाल्लो. फायनल 20 ओव्हरींची जाल्ली. रवींद्र जडेजाच्या अश्टतासी खेळाच्या नेटार भारत वस्ताद जाल्लो. हे मॅचींत खेळिल्ले तिगजाण अंदूंय खेळटात. जडेजा, रोहीत शर्मा आनी विराट कोहली. अंदूं ह्या तिगांयचो अणभव म्हत्वाचो थारतलो.
2017 त भारत फायनलींत पाविल्लो. मात, पाकिस्तानान त्या वेळार जबरदस्त खेळ करीत ही सर्त आपल्या नांवार केली. आतां 8 वर्सांनी ही सर्त पाकिस्तानांत जाता. भारतान पाकिस्तान खेळपाक न्हयकार दिल्ल्यान भारताच्यो मॅची युएईंत जातल्यो. हे सर्तींत 2004 चो चँपियन वॅस्ट इंडीज ना. अफगाणिस्तानान वन डे रँकिंगांत उडी मारून वॅस्ट इंडिजाक फाटीं घालें. बांगलादेशानूय आपली सुवात राखतना श्रीलंकेक फाटीं उडयलो. वॅस्ट इंडीज आनी श्रीलंका हे एका तेंपा वयले बळिश्ट पंगड हे सर्तींत दिसचें नात.
भारतान हे सर्ती खातीर वन डे वर्ल्ड कप, तशेंच टी- 20 वर्ल्ड कपा खातीर खेळयिल्लो तसोच पंगड जाहीर केलां. जसप्रीत बुमराह दुखापतीक लागून खेळना, जाल्यार रोहीत शर्मान एक्स फॅक्टराचें गणित मांडून मुहम्मद सिराजाचे सुवातेर हर्षीत राणाक खेळोवपाचो निर्णय घेतला. रविचंद्रन आश्वीन निवृत्त जाल्ल्यान तो हे सर्तींत ना. भारतान मिस्ट्री स्पिनर म्हूण मुखार आयिल्ल्या वरुण चक्रवर्तीक संद दिल्या. हेर पंगड संतुलीत. हारीची शक्यताय उणी आसतली असोच पंगड हे सर्तींत देंवयला. रोहीत शर्मा, शुभमन गिल, विराट कोहली, श्रेयस अय्यर, लोकेश राहूल हे बॅट्समॅन, जाल्यार 2013 च्या सर्तीचो हिरो रवींद्र जडेजा, फाटल्या टी-20 वर्ल्ड कपाचो हिरो हार्दीक पांड्या, जडेजाचो योग्य पर्याय म्हूण फुडें आयिल्लो अक्षर पटेल, भारताचो स्पीड स्टार मुहम्मद शामी, बुमराहचे गैरहाजेरेंत टी- 20 क्रिकेट प्रकारांत अव्वल थारिल्लो अर्शदीप सिंग अशें खेळगडे भारता वतीन खेळटना दिसतले. 11 वो खेळगडो कुलदीप यादव ना जाल्यार वरुण चक्रवर्ती आसतलो. भारताचो पंगड इतलो मजबूत आसा की ऋषभ पंता सारक्या घातक बॅट्समॅनाक भायर बसोवप परवडटा.
ऑस्ट्रेलियाचो पंगड ह्या वेळार तांच्या मुखेल बॉलरां बगर सर्तींत देंवता. पॅट कमिन्स, मिशेल स्टार्क, जोस हेजलवूड जखमी आसात. मार्कूस स्टॉयनिसान चार दिसां पयलीं अकस्मात निवृत्ती घेतली. हे चवगूय नाशिल्ल्यान ऑस्ट्रेलिया तांच्या दुसऱ्या फळयेच्या बॉलरांचेर निंबून आसा. दक्षीण आफ्रिकेचीय तयारी बरी जाल्या. तिरंगी माळेंत तांणी प्रयोग केले. ते आंगलट आयलें. मात, हे प्रयोग करून चँपियन्स ट्रॉफींत कितें करपाक जायना, हें ते शिकले.
इंग्लंड भारता आड सापूच बाबत पद्दतीन हारले. मात, चँपियन्स ट्रॉफींत ते अशेंच खेळचें नात. तांणी भारता आड बझबॉल खेळ खेळ्ळोच ना. सॉल्ट आनी बकेटान बझबॉल खेळपाचेर भर दिलो. हेरांनी पारंपरिक खेळ करून पळयलो. सर्तींत ते अंडरडॉग्ज म्हूण देंवतात. सांखळी फेरयेंत ऑस्ट्रेलिया आनी दक्षीण आफ्रिकेक तांचे कडल्यान धोको आसा. ह्या गटांत अफगाणिस्तानूय आसा. आशिया खंडांत अफगाणिस्तान धोकादायक पंगड म्हूण मुखार आयलां. तेन्ना हो गट ‘ग्रूप ऑफ डॅथ’ थारूंक शकता.
भारताच्या गटांत पाकिस्तान, बांगलादेश आनी न्युझिलॅण्डाचो आस्पाव आसा. 23 फेब्रुवारीक भारत आड पाकिस्तान ‘हाय वोल्टेज’ मॅच जातली. ही मॅच जिखपाची भारताची मोख आसतलीच. मात, हे मॅची बरोबरच सर्तूय जिखपा खातीर भारत पुराय यत्न करतलो. रोहीत शर्मा आनी विराट कोहली फुडलो वर्ल्ड कप खेळटले कांय ना हें वेळूच सांगतलो. मात, ह्या दोगांय खातीर होच वर्ल्ड कप जावन आसा.
पाकिस्तानान फाटल्या दोन वर्सांत कितल्योश्योच मॅची व्हगडायल्यो. मात, तांकां आतां बरे नवे खेळगडे मेळ्ळ्यात. तांच्या नेटार ते बरे प्रदर्शन करीत आसात. ते सेमी फायनलींत दिसल्यार अजाप जावपाची गरज ना. आयसीसी सर्तींत न्युझिलॅण्ड सदांच ‘डार्क हॉर्स’ आसता. सगल्यांक फाटी उडोवन नॉक आवट स्टेजींत पावपाचो तांचो इतिहास आसा. भारताक आयसीसी सर्तींत ते सदांच नडटात. फाटल्या वन डे वर्ल्ड कपांत रोहीत शर्मान आक्रमक खेळ करून तांची आडखळ पयस केल्ली. आतांय तश्याच प्रदर्शनाची गरज आसा.
आयसीसी सर्तींत बांगलादेश भारता मुखार सदांच आव्हान निर्माण करीत आयला. भारताक तांचें आव्हानूय मोडून काडचें पडटलें. नॉक आवटांत भारताक चड करून दक्षीण आफ्रिका नाजाल्यार इंग्लंडा आड खेळचें पडटले. ते नदरेनूय भारत तयार आसाच.

अमर पाटील
7507495151