भांगरभूंय | प्रतिनिधी
आमच्या भारतांत घोशणांचो दुकळ केन्नाच पडूंक ना. साबार नारे, घोशणांनी स्वातंत्र्यलढ्याक बळगें मेळ्ळां. ‘जय हिंद, इन्कलाब जिंदाबाद, भारत माता की जय’ अश्यो घोशणा अज्रंवरुय जाल्यात. आयज पसून जायत्यो घोशणा लढो, आंदोलनाक उर्बा, उमेद मेळोवन दिता. आंदोलकांचो आत्मविस्वास वाडयता. ह्यो घोशणा साबार तरांच्यो आसतात. तातूंतली एक म्हणल्यार राजकी घोशणा. मुखार शेंकड्यांनी लोक पळयले काय फुडाऱ्यांच्या तोंडांतल्यान ती आपशीच भायर सरता. ती कानार पडली काय लोकांच्यो टाळयांचेर टाळयो. खोशेच्यो हुयेली. लोकप्रतिनिधीच्या नांवाचो जयजयकार. पूण ती घोशणा वा आस्वासन पुराय जाताच अशें ना. वाऱ्याचेर अळंग परमळ पातळचो, पयस पयस मेरेन तो हुबचो आनी कांय खिणा भितर वातावरणांत विरगळून वच्चो, तशी ती घोशणा रेंवेंत उदक जिरचीं तशी नाच्च जाता. परत फुडले प्रचार सभेंत उदेंवपाक!! फकत फुडारीच न्हय, तर संघटना, संस्था, मंडळांय हालींसराक घोशणा दिवपाक सामकीं फिशाल जाल्यांत. अर्थांत भौसाकूय कालचें आयज याद उरना. देखूनच घोशणांक अंत ना. अश्वत्थामा परस त्यो चिरंजीव.
बीसीसीआयन दिवाळे दिसाच म्होंवाळ घोशणा केल्ली. बायलां क्रिकेट खेळगड्यांचें मानधन वाडोवपाची. दादलो आनी बायल खेळगड्यां मदलो भेदभाव आयच्यान सोंपलो, अशेंय तांणी म्हणिल्लें. कितली खोस जाल्ली तेन्ना सगल्यांक? देशांतल्या भोवतेक सगल्या खबरां चॅनलांनी, दिसाळ्यांनी हाची दखल घेतिल्ली. हड्डें भरून आयिल्ल्यान कांय दिसाळ्यांनी अग्रलेख बरयिल्ले. स्पेशल स्टोरी केल्ली. बायल खेळगड्यांक मानधन मेळटा, पूण….. दादल्यां इतलो तांच्या मॅचींचो आंकडो वाडूंक ना. म्हणटकच तांच्या हातांत लक्ष्मी येना. हे घटकेक तरी दादल्यांचे तुळेन तांच्या मॅची वाडपाचीं चिन्नां नात, म्हणजे फुडलीं कांय वर्सां तरी बायल क्रिकेट खेळगड्यांचो ‘बँक बॅलन्स’ आसा तसो उरतलो. उरफाटो उणोय जावपाची भिरांत आसा. पोरूं बीसीसीआयचे मानद सचिव जय अमित शहा हांणी दादल्यांक मेळटा तितलेंच मानधन बायलांकूय मेळटले अशें सांगिल्लें. म्हणजे एक टेस्ट मॅच खेळ्ळ्यार 15 लाख, एका दिसाची मॅच खेळ्ळ्यार 6 लाख आनी टी- 20 खेळत जाल्यार 3 लाख. मानधनाचो आंकडो तसो वायटसो ना. पूण जर मॅचीच जायनात, जाल्यार दुडू खंयचो मेळटलो? घोशणा प्रत्यक्षांत येतली कशी? मॅचीच जायनात जाल्यार बायलांक खेळाचो सराव कसो जातलो आनी तांचे क्रिकेटीचो दर्जो वाडटलो कसो? मानधनाची घोशणा पळोवंक बरी दिसता, पूण भितरल्यान पोल, म्हणटकच ती वाऱ्यार हुबतली, हो हुस्को खेळांमोगींक आसा.
जाणकारांच्या मतान, फुडल्या तीन वर्सांच्या काळांत भारतीय बायलां क्रिकेट पंगडाक 62 मॅचींतल्यान 31.92 कोटी मेळटले. दादल्यांक एका वर्सांत 45 मॅचींनी 27.70 कोटी मेळटले. म्हणजे बायलो 32 कोटी जोडटा म्हणसर दादल्यांचो पंगड 84 कोटीं वयर पावतलो. लागीं लागीं तीन पटींनी! ताचे भायर बायलांचे तुळेन तांची क्रेझ चड आशिल्ल्यान कार्यावळींनी मुखेल सोयरे, जायराती, टीव्ही शो, सोशल मिडिया हाचे वरवींय ते जोडटात. बायलांच्यो मॅचीच जायनात, जाल्यार तांचें क्रिकेट मळ लोकप्रीय कशें जातलें? जायना जाल्यार खेळगड्योय काळखांत उरतल्यो आनी मागीर प्रेक्षकांचो तेंको ना, हें कारण मुखार करून बायलांक दोट्टी वागणूक दिवपाक खेळां प्रशासक, संस्था मेकळ्यो. म्हणजे ही बीसीसीआयची बायलां क्रिकेटी कडेन जाल्ली आडनदर म्हणपाची? क्रिकेट हें खेळ कमी, रोजगाराचें मळ चड जालां, हें आमी विसरूंक फावना. आतां आयपीएल सुरू जालां. तातूंत गांवगिऱ्या वाठारांतल्यो चलयो खेळटात. दादल्यांच्या आयपीएलांत ग्रामीण भागांतल्यान आयिल्ले बरेच खेळगडे आयज स्वताच्या पांयांचेर उबे आसात. धोनी सारक्या कांय खेळगड्यांनी तर आंतरराष्ट्रीय नामना मेळयली. देशांतली गरिबी कांय प्रमाणांत ना करपांत क्रिकेटीन योगदान दिलां, हें विसरूंक जावचें ना.
आदल्या काळांत टेस्ट मॅचींक खूब म्हत्व आशिल्लें. उपरांत एक दिसाच्यो मॅची सुरू जाल्यो. मात, सध्या टी- 20 मॅची सगल्यांच्या माथ्यार बसल्यात. भारताचो बायलांचो पंगड टेस्ट मॅचींनी खूब फाटीं आसा. टेस्ट मॅच जिखून आमकां आठ वर्सां जाल्यांत. फाटल्या चार वर्सांत बायलांचो पंगड फक्त दोन टेस्ट मॅची खेळ्ळा. म्हणल्यार दोन वर्सांनी एक पडली. दादले एका वर्सांत सात तरी टेस्टी खेळटात. बीसीसीआय टेस्ट मॅची कडेन कित्याक आडनदर करता तें कळना! बायल खेळगड्यांची फाटोफाट खेळपाची तयारी आसा, पूण मॅचीच जायनात, ताका त्यो तरी कितें करतल्यो. मानधनाची घोशणा प्रत्यक्षांत येवपाक जाय जाल्यार मॅची वाडोवप होच एकमेव उपाय आसा!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
