भांगरभूंय | प्रतिनिधी
बंगळुरू, खबरां संस्थाः समाज सुदारपाक जाय म्हूण सरकारान शिक्षण मुफत केलां, मात कांय जाण आपणाक जाय तसलेच कायदे आपणायतात, अशें दिसून आयलां. कर्नाटकाच्या दावणगिरींतल्या तवारेकेरे गांवांत अशीच एक घडणूक घडल्या, जी मनीसपणाक खत लावपी थारल्या.
एक मशिदी भायर कांय दादल्यांनी एके ३८ वर्सां पिरायेचे बायलेक मारिल्ल्याचो आरोप जाला. घरगुती केस्तावां उपरांत तिका न्यायनिवाडा करपाक मशिदींत आपयिल्ली. शबिना बानू हे बायलेक तिची सोयरी नसरीन (३२) आनी फैयाज ह्या दादल्याक मशिदींत आपोवन व्हेल्ली. तिच्या घोवान जमिल अहमद शामीर हाणें तिचे आड कागाळ केल्ली.
मशिदी भायर खूब दादले जमिल्ले. तातूंतल्या कांय जाणांनी बडी, पायप घेवन आपणाक बडयली. मागीर गुंडे मारून आपणाक मारपाचोय यत्न केलो, अशें ते बायलेन पुलिशेक सांगलां. हो सगलो व्हिडियो कांय जाणांनी रेकाॅर्ड करून व्हायरल केलो. पुलिसांनी ते बायलेचे कागाळे उपरांत तिणें नांवां दिल्ल्या स जाणांक अटक केल्या.
कागाळे प्रमाण, शबिना ही वावराडी म्हूण काम करता. ती नसरीन, दोन बायलो आनी भुरग्यां सयत बुक्कमबुडी दोंगरार फिरपाक गेल्ली. सांजची घरा आयली. बरें दिसना म्हूण गुळी घेवन सुशेग घेवपाक लागली. देखून नसरीन ते दीस तांगेर रावली. त्या वेळार फैय्याज थंय आयलो. उपरांत शबिनाचो घोव थंय आयलो आनी नसरीन, फैय्याजाक पळोवन तो बेजार जालो. ताणें मशिदींत वचून कागाळ केली. उपरांत ही घडणूक घडली.
हो प्रकार नेमको कितें, मशिदी भायर तिका बडोवपाचो निर्णय कोणे, खंयच्या कायद्या खाला घेतलो, ताची चवकशी पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
