भांगरभूंय | प्रतिनिधी
पाटणा न्यायालयाचें निरीक्षण
पाटणां, खबरां संस्था ः घोव- बायलेच्या झगड्याचीं जायतीं प्रकरणां कुटुंबीक वा हेर न्यायालयांत आसात. हे संबंदी समुपदेशन सारके पर्याय उपलब्ध आसात. तरी ह्यो केशी न्यायालयांत पावतात आनी केन्ना केन्ना घटस्फोटाकूय परवानगी मेळटा. अशा कांय प्रकरणांनी दोनूय गट एकमेकांचेर आरोप करतात. पूण आतां फटीचे आरोप करप म्हारग पडपाक शकता. पाटणा उच्च न्यायालयांत सुनावणे खातीर आयिल्ल्या अश्याच एका प्रकरणांत न्यायालयान एक म्हत्वाचो आदेश दिला.
नेमकें कितें जालें?
ही सुनावणी पाटणा उच्च न्यायालयाच्या खंडपिठा मुखार जाली. ह्या प्रकरणांत घोवा घरा कुटुंबीक जबाबदार्यांच्या नांवा खाला त्रास जातात, अशी कागाळ एके बायलेन केल्ली. ह्या प्रकरणाचे सुनावणे वेळार न्यायालयान निराधार आरोपांचेर टिप्पणी केली. हे बायलेक घोवा घरा चड त्रास, मनस्ताप जातात जाल्यार तिणें योग्य तो मार्ग वापरून ताचे आड कागाळ करपाची अपेक्षा आशिल्ली. पूण तिणें घोवाचेर फटीचे आरोप करपाचो मार्ग आपणायलो असोय उल्लेख न्यायालयान केला.
लायव्ह लॉनान ह्या प्रकरणाची सविस्तर म्हायती दिल्या. २९ नोव्हेंबर २०१२ दिसा याचिकादाराचें लग्न जाल्लें. तांकां एक पुतूय जालो. जून २०१५ मेरेन हें जोडपें मुंबय रावतालें. पूण मागीर कुटुंबीक जापसालदारकेक लागून तिका बिहाराक घोवाच्या घरांत स्थलांतरीत करचें पडलें. ते उपरांत कुटुंबीक हिंसाचाराची समस्या सुरू जाली असो दावो बायलेन याचिकेंत केला. आपल्या आवय-बापायची जतनाय घेवपाक गांवांत रावचें पडटलें असो घोवान आग्रो केलो. घोवाच्या आवय-बापायचेंय म्हणणें तेंच आशिल्लें. उपरांत आपलो छळ करपाक सुरवात जाल्ल्याचें ते बायलेन म्हणलां.
शिंदळकी धंद्याक लावपाचो आरोप
हे संबंदी बायलेन २०१६ वर्सा आपल्या घोवाचेर, मांय- माव आनी हेर नात्यांतल्या स जाणां आड कुटुंबीक त्रास आनी क्रूरपणाचो आरोप करून पुलिशेंत कागाळ केल्ली. तशेंच लुकसाण भरपाय मागतना जबरदस्तीन तिच्या घोवान आनी ताचे आवयन तिका शिंदळकी करपाक लायिल्ल्याचो आरोप बायलेन केला. तशेंच बायलेन आपल्या घोवाचेर फटोवपाचो आरोप केला. पूण उपरांत बायलेन आपल्या वकिलाच्या प्रभावा खाला हे फटकीरे आरोप केल्ल्याचें मान्य केलें.
न्यायालयान नोंद केलो खर आक्षेप
मजगतीं, ह्या आरोपाक लागून घोव आनी ताच्या कुटुंबियांनी समाजांत अपमानाक तोंड दिवचें पडलें. हातूंत ताका मानसीक ताण सोंसचो पडिल्ल्याचो आरोपींचो दावो न्यायालयान मान्य केला. ह्या प्रकरणांत बायलेक कुटुंबीक आनी हुंड्या खातीर छळ सोंसचो पडलाच. ताका लागून बायलेन योग्य मार्ग घेवन दाद मागूंक जाय आशिल्ली. पूण तिणें फटींग आरोप करपाचो मार्ग आपणायलो. हे आरोप गंभीर आशिल्ल्यान ह्या आरोपांक लागून तिचो घोव आनी कुटुंबियांचो अपमान जाला. तांकां मानसीक धक्को बसला. हो मानसीक क्रूरतायेचो प्रकार जावन आसा, अशें न्यायाधिशान सांगलें.
हे टिप्पणी सयत न्यायालयान घोवान अर्ज केल्ली घटस्फोटाची याचिका दाखल करून घेतली. ४ जून २०१५ सावन घोव आनी बायल वेगळीं रावतात. हें लक्षांत घेवन न्यायालयान घोव- यलेचो घटस्फोट मंजूर केला. तशेंच घोव स्वता महाराष्ट्र सरकाराच्या वीज खात्यांत पयल्या दर्ज्याचो अधिकारी म्हणून काम करता देखून न्यायालयान बायल आनी पुताचो सांबाळ करपा खातीर १० लाख रुपया लुकसाण भरपाय दिवपाचो अंतरीम आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
