भांगरभूंय | प्रतिनिधी
रातच्या वेळार विमान येरादारी कमी करप म्हणल्यार हेरां परस इंडिगोक ताचो चड फटको बसला. कारण…..
कसलीय गजाल सुरू केली काय घुस्पागोंदळ हो जाताच जाता. ताचो फटको दुसऱ्यांक बसता. विमानांच्यो उड्डाण ड्युटी वेळो मर्यादीत (एफडीटीएल) केल्ल्यान देशभरांत इंडिगो विमानांच्या प्रवाशांक खूब मनस्ताप सोंसचो पडटलो. गोंयच्या दोनूय विमानतळांचेर विमानां वेळार सुटूंक नाशिल्ल्यान, रद्द जाल्ल्यान प्रवाशांक त्रास जाले. ‘आमकां विमान कंपनीन ते विशीं कांय कळोवंक ना, दुसरी वेवस्थाय करूंक ना. आमची म्हत्वाचीं कामां आडकून उरलीं,’ अश्यो कागाळी आशिल्ले प्रवाशांचे व्हिडियो व्हायरल जाल्यात. नागरी विमान उड्डाण महासंचलनालयान ह्या गोंदळाक विमान कंपनींक जापसालदार धरल्यात. मात इंडिगो सोडून हेर कंपनींची विमानसेवा तशी सुरळीत आशिल्ली. फाटल्या म्हयन्यांत विमानांतल्या कर्मचाऱ्यांचो ड्युटी, सुसेग घेवपाचो वेळो, रातचीं विमानां देंवोवपाच्यो वेळो बदल्ल्यात. ताका लागून हो प्रकार घडला.
विमानांतल्या दोशांक लागून वा पायलट थकिल्ल्यानूय दुर्घटनां जातात. देखून पायलट, हेर कर्मचाऱ्यांक सुसेग दिवपाक नवे नेम केल्ले. पोरूं जूनांत लागू जावपाचे हे नेम इंडिगो सयत हेर कांय विमान कंपनींच्या विरोधाक लागून स्थगीत दवरिल्ले. मात अंदूं दोन टप्प्यांत ते चालीक लायले. ‘सगलें जाग्यार घालपाक आनीक कर्मचारी जाय. ताका लागून वेळ दिवचो’, अशें कंपनींनी म्हणिल्लें. पायलटांक सप्तकांत 36 वरां सुसेग घेवपाक मेळटा, तो वेळ वाडोवन 48 वरां केला. रातचीं स विमानां देंवतालीं, तीं आतां दोनूच देंवतात. पायलट, कर्मचाऱ्यांचे सेवेचो वेळ बदलून घडी बसोवप इंडिगो कंपनीक कठीण गेलें. खास करून दुसरो टप्पो. कारण ही कंपनी सगल्यांत व्हडली. एका आंकड्या प्रमाण, देशांतली 50 टक्क्यां वयर येरादारी इंडिगो सांबाळटा. चारशें परस चड विमानां दरदिसा 2300 उड्डाणां करता. रातच्या वेळार विमान येरादारी कमी केल्ल्यान हेरां परस इंडिगोक चड फटको बसला. कारण तांचीं उड्डाणां चड. इंडिगोची तिकेट कमी, प्रवासी चड. अचूक वेळार उडून, वेळार इत्सीत थळाचेर पावपी, अशी तिची नामना आसा. मात ह्या नव्या नेमांक लागून ताचें गणीत गडबडलें. तरी पायलट, कर्मचारी कमी आसतनाय तांणी उड्डाणां केलीं. फेब्रुवारी मेरेन सगलें जाग्यार पडटलें, अशें आस्वासनूय दिलां. हे घडणुकेचो गैरफायदो घेवन कांय कंपनींनी तिकेट चार हजारां वयल्यान 40 हजारां मेरेन वाडयल्या, तें चुकीचें. नव्या नेमाक लागून बरे कंपनीची पत देंवपाक शकता, हें आमी विसरूंक फावना.
गोंयांत दाबोळेचीं 38 मदलीं 31 उड्डाणां रद्द जाल्यांत. एकाच दिसा 19 उड्डाणां जावंक नात. तर मोपाचीं तीन रद्द केल्यांत. आतां विमानांनी भोंवपी प्रवाशांचो आंकडो खूबच वाडला. कांय वेळार तर तिकेटीय मेळनात. म्हणटकच देशांतली येरादारी, अर्थवेवस्थेक विमान कितलें म्हत्वाचें तें कळटा. सगल्या विमान कंपनींनी म्हत्वाच्या विमानतळांचेर जादा पायलट, कर्मचारी दवरले जाल्यार ही समस्या कांय प्रमाणांत सुटूं येता. हे खातीर पायलट, कर्मचारी वाडोवचे पडटले. खंयच्या मार्गाचेर कोणाक कितलो वेळ ड्युटी मेळटली, खंयच्या वेळार उड्डाणाक उशीर करपाचो, हाचो पुराय अभ्यास करचो पडटलो. कर्मचाऱ्यांक विमानांतूच आलटून पालटून न्हिदपाक वेळ दिवं येता. विदेशांत कांय कडेन ही पद्दत आसा. बऱ्याच विमान कंपनींचो ‘शेड्यूल टायट’ आसता. मदीं वेळ (बफर टायम) दवरूं येता. विमानतळाचेर कितलीं विमानां देंवोवचीं, हेंय थारावंक जाय. विमान वेळार येवंक ना, रद्द जालें जाल्यार कितें करपाचें तें प्रवाशांक पयलींच कळपाक जाय. विमानतळाचेर भितर सरतकच न्हय. हवामानूय मतींत घेवचें पडटलें.
नेम बदलिल्ल्यान हें जालांच, पूण उणे कर्मचारी, वाडिल्ले प्रवासी, फाटोफाट उड्डाणां हीं कांय कारणां आसात. सगलें बेगीन जाग्यार पडचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
