भांगरभूंय | प्रतिनिधी
हिंदी सिनेमा नट सैफ अली खानाचेर 16 जानेवारीचे मध्यानरातीं हल्लो करपी दुबावीताची वळख पटल्या. तो बांगलादेशांतल्या जालकटी जिल्ह्यांतलो आसूं येता, अशें मुंबय पुलिसांनी म्हणलां. ताच्या जी- पे अकावंटाचेर तसो उल्लेख आसा. पूण, ताका नांवां बदलपाचीं संवय आशिल्ल्यान पुलिसूय घुस्पल्यात. तो स म्हयन्यां पयलीं मुंबयंत आयिल्लो, अशें ते सांगतात. तर दुबाविताच्या दोन वकिलांच्या दाव्या प्रमाण, तो फाटलीं सात वर्सां कुटुंबा सयत मुंबयंत रावता. तो बांगलादेशी आशिल्ल्याचें सिद्ध करपी पुरावे पुलिसांनी अजून न्यायालयाक दिवंक ना, अशेंय तांचें म्हणणें. दुबावितान आपलीं दोन मुस्लीम आनी एक हिंदू नांव, आडनांव सांगलां. इस्लाम शरीफुल, दास हीं ताचीं आडनांवां पळयत जाल्यार तो बांगलादेशी स्थलांतरीत ह्या दुबावाक जल मेळटा. सत्य कितें तें उक्तडार येतलेंच, पूण आमच्या देशांत सोंपेपणी प्रवेश करपाक मेळटा, हें ह्या प्रकरणान परत एकदां सिद्ध जालां.
बंगालाची लाॅर्ड कर्झनान 1905 त फाळणी केली. पूर्व आनी अस्तंत बंगाल जल्माक आयलो. प्रशासकीय कारणांक लागून आनी लोक चडूच राष्ट्रवादी जाल्यात, अशें दिशिल्ल्यान ब्रिटीशांनी हें पावल उखल्लें. उपरांत 1947 चे फाळणे वेळार हो पूर्व बंगाल पूर्व पाकिस्तान जालो. कारण थंय चड मुस्लीम आशिल्ले. राष्ट्रीय भाशा बंगाली आनी हेर कांय कारणांक लागून अस्तंत पाकिस्तानाच्या लश्करा कडल्यान तांचेर अत्याचार, अन्याय जातालो. उपरांत प्रधानमंत्री इंदिरा गांधीन त्या वाठाराक स्वातंत्र्य दिलें आनी 1971 त बांगलादेश निर्माण जालो. त्या वर्सा डिसेंबर मेरेन साधारण 1 कोटी बांगलादेशी नागरीक भारतांत आयले. तातूंतल्या भोवतेकांक भारतीय नागरीक मानल्यात. पूण, उपरांतच्या काळांत बेकायदेशीर पद्दतीन भारतांत घुशिल्ले 25 लाख तरी बांगलादेशी नागरीक आसतले. कांय जाणांच्या मतान, हो आंकडो कोट्यांनी आसा. गोंयांतूच पांच लाखां वयर बांगलादेशी आसात, असोय एक दावो. अस्तंत बंगाल, आसाम आनी ईशान्ये कडल्या राज्यांतल्यान दरदिसा शिमे वयल्यान घुसखोरी करुन भारतांत येवपी लोक आसात. हाचे व्हिडियो पसून फाटीं राष्ट्रीय खबरां चॅनलांचेर दाखयताले. आमचे शिमे वयले संरक्षण वेवस्थेचेर उजवाड घालपी हें कोडू सत्य. बांगलादेशांतलीं कांय शारां, गांव विकसीत आसले तरी अजून थंय व्हड प्रमाणांत बेकारी, गरिबी आसा. ताका लागून पोटाक लागून थंयचे लोक हांगा येतात. खरें म्हणल्यार तांणी येताच जाल्यार कायदेशीर पद्दतीन येवंक जाय. घडये फुकटांत घुसपाक मेळटा जाल्यार त्यो राटावळी कित्याक करुया असो तांचो दृश्टीकोन आसुये. आयज कांय भारतीय कॅनडांतल्यान अमेरिकेंत बेकायदेशीर प्रवेश करतात, शिक्षणा खातीर थंय वचून नोकरी, वेवसाय करतात, तसलोच कांयसो हो प्रकार!
सध्या भारतांत नेपाळ, अफगाणिस्ताना फाटोफाट बांगलादेशांतले विद्यार्थी आसात. दरवर्सा 2- 3 हजार विद्यार्थी नांवनोंदणी करतात. बांगलादेशांत फाटलें वर्सभर अस्थिरताय आशिल्ली. तेन्ना थंयचे 7200 भारतीय विद्यार्थी मायदेशांत परत आयिल्ले. थंय 19 हजार भारतीय रावतात. तातूंतले णव हजार विद्यार्थी. ही म्हायती केंद्रीय मंत्र्यान राज्यसभेंत दिल्ली.
दुसऱ्या देशांत वतात तांणी थंय प्रामाणीकपणान काम वा शिकप करपाचें. नाका जाल्ले उपद्व्याप केले काय मागीर ताचे परिणाम सगल्यांकूच भोगचें पडटात. गुन्यांवाच्या मळाचेर तर तांणी पावल दवरपाकूच जायना. खास करून इस्लामी देशांनी तर गुन्यांव सिद्ध जावप म्हणल्यार स्वताचो जीव वगडावप. बांगलादेशांतल्यान आयिल्ले कांय जाण भारतविरोधी कारवायांनी सांपडल्यात. ताका लागून बरेच भारतीय तांचेर बेजार आसात. पूण, तातूंतल्या कांय जाणांक आमी भारतीयूच आमच्या देशांत घुसपाक मजत करतात. तांकां सगले दाखले, परवाने मेळोवन दितात, ही चुकीची गजाल. सैफाचेर हल्लो करपी तरणाट्यान दोन कडेन नोकरी केल्या. मागीर तो मध्यानरातीं घरांनी घुसून चोरयो कित्याक करतालो, तें कळना. सरकारी यंत्रणांनी सगल्याच घुसखोरांची बारीकसाणेन चवकशी करून तांकां परत तांच्या देशांत धाडुंक फाव. ताचे पयलीं तांकां हांगा कोणे हाडले, बिराड दिवपाक, आदारकार्ड आनी हेर दाखले करपाक मजत केली, ताचीय चवकशी जावंक जाय. सगलें खबर आसून लेगीत कोण जर तांकां आसरो दिता जाल्यार तें राष्ट्रविरोधी काम जालें. सैफाचेर हल्लो करपा फाटल्यान फक्त चोरी होच उद्देश आसा काय आनीक कितें कारण आसा, तेंय सोदचें पडटलें. दुसरे वटेन, करोडांनी रुपयांचे राशीर लोळपी मनीस स्वताची सुरक्षा वेवस्था कित्याक घट करीनात. इमारतींत बोवाळ जावनूय ते रातीं एकलोय फ्लॅटा भायर वा मजतीक कसो आयलो ना, त्याय प्रस्नांच्यो जापो सोदच्यो पडटल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
