भांगरभूंय | प्रतिनिधी
अंदूंची मोहीम संघटीत गुन्यांव आनी ड्रग्स वेव्हाराचें दुश्टचक्र मोडपा खातीर समन्वयीत दीर्घकाळ कृती करपाची गरज उजवाडायता. हें केल्यारच आमी भलायकी, शिक्षण आनी समाजीक वेवस्था घटमूट करूंक पावतले.
एकवटीत राष्ट्रांनी 7 डिसेंबर 1987 दिसा एक खाशेलो थाराव घेतलो. ड्रग्स दुरुपेग मुक्त आंतरराश्ट्रीय समाजाचें ध्येय साध्य करपाक कृती आनी सहकार्य घटमूट करपाचो निर्धार म्हूण तांणी 26 जून हो आंतरराश्ट्रीय ड्रग्स दुरुपेग आनी बेकायदेशीर वेपाराआड दीस म्हूण जाहीर केलो.
दर वर्सा संवसार भरांतल्यो व्यक्ती, समाज आनी वेगवेगळ्या संघटनांचो आदार घेवन हो दीस पाळटात. बेकायदेशीर वखदां समाजाक बादीकार करतात, त्या मुखेल समस्यां विशीं जागृताय करपाचो हाचे फाटलो हेतू आसा. हो वेपार आळाबंदा हाडपाक जाय. संवसारीक ड्रग्स समस्या एक बहुआयामी आव्हान थारलां, जी संवसारभर लाखांनी लोकांच्या जिविताक पिडटा. द्रव्यांच्या वापरा आड झगडपी व्यक्तीं पासून ते ड्रग्स वेव्हार आनी संघटीत गुन्यांवांच्या परिणामां कडेन झगडपी समाजा मेरेन ड्रग्साचो परिणाम बहुआयामी आनी गुंतागुंतीचो आसा. ह्या आव्हानांक तोंड दिवपाक खर धोरण जाय, जातूंत हें वेसन आनी वेपार मुदलांत आळाबंदा हाडपाक आनी ताच्या प्रसाराआड उपाय घेवपाक प्राधान्य दिवपी शास्त्रीय पुराव्याचेर आदारीत पद्दत आपणावप गरजेचें.
ह्या संवसारीक दिसा, ड्रग्साचो दुरुपेग मुक्त संवसार जावपा खातीर कृती आनी सहकार्य घटमूट जाता. अंदूंच्या संवसारीक ड्रग्स दिसाक न्याय, शिक्षण, भलायकी जतनाय आनी पर्यायी उदरनिर्वाह हाचे पासत ड्रग्सांचें हें दुश्टचक्र मोडपाक प्रतिबंधक उपायांत गुंतवणूक करपाचो उलो मारला. अंदूंची मोहीम संघटीत गुन्यांव आनी ड्रग्स वेव्हाराचें दुश्टचक्र मोडपा खातीर समन्वयीत दीर्घकाळ कृती करपाची गरज उजवाडायता. हें केल्यारच आमी भलायकी, शिक्षण आनी समाजीक वेवस्था घटमूट करूंक पावतले.
दोन दशकां सावन संयुक्त राश्ट्रांचें ड्रग्स आनी गुन्यांव कार्यालय संघटीत गुन्यांव, भ्रश्टाचार आनी आतंकवाद हांचेपसून संवसार सुरक्षीत करपाक धडपडटा. ह्या मळार अमाप बेकायदा दुडवांचो लाव मेळटा. देखून तरनाटे आनी हेर लोक ताचे कडेन लागीं ओडटा. हांगां भ्रश्टाचाराक खूब पोसवण मेळटा. सरकारी नियंत्रण यंत्रणा भ्रश्टाचारान पोखरतात. ताका लागून प्रामाणिक आनी खर कारवाय फावो त्या नेटान जायना. कांय राजकारण्यांचेय हातूंत हितसंबंध आसतात, तेय कारवाय करपांत आडमेळीं हाडटात.
गोंय सारखें किनारी पर्यटक राज्य अंमली पदार्थांच्या किरकोळ विक्री आनी व्यापाराचें केंद्र म्हणून प्रस्थापित जालां. सांगावं आदीं वेळो वाठारांतल्या तरनाट्यां मेरेन ही समस्या मर्यादित आसली. करतां करतां ती हेर वाठारांतल्या शाळा -काॅलेज चले- चलयो हांचे मेरेन पातळत आसा. जायते संवसार तातूंत बरबाद जातात. तरनाट्यां मदीं वाडपी आत्महत्या प्रकरणाचें हें एक कारण आसा अशें मानसिक भलायकी वाठारांत काम करपी दोतोर, संस्था मानतात.
ड्रग्स म्हणल्यार ?
बेकायदेशीर वखदां मनशाच्या अफाट दुख्खाचो उगम. चड दुबळे लोक, खास करून तरणाटे ह्या संकश्टांत सोंपेपणान फारावतात. एक फावटी ह्या वेसनांत सांपडिल्ल्या ड्रग्स वापरपी लोकांक आनी वेसना आड झगडपी लोकांक जायत्या आव्हानांक तोंड दिवचें पडटा.
वखदांचो हानीकारक परिणाम, तांकां दशिल्लो समाजीक कलंक हे तरेकवार समस्या निर्माण करतात.
आंतरराष्ट्रीय दीस कित्याक मनयतात?
आंतरराष्ट्रीय दीस आनी सप्तक हे लोकांक समाजीक हुसक्यांच्या प्रस्नांचेर जागृत आनी शिक्षित करपाची संद. संवसारीक समस्या सोडोवपा खातीर राजकी इत्सा आनी साधनां एकठांय करपाचे आनी मनीसपणाच्या कामगिरीची तोखणाय करपाची आनी बळगें दिवपाची ती जाहीर संद आसता. आंतरराश्ट्रीय दिसांचें अस्तित्व संयुक्त राश्ट्रांचे स्थापने पयलींचें आसलें, तरी संयुक्त राश्ट्रांनी तांकां एक बळिश्ट वकिली साधन म्हणून आपणायलां.
– प्रकाश वा. कामत
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
