भांगरभूंय | प्रतिनिधी
कपील नायकः लोककला सांबाळपाचो तरणाट्यांक उलो
भांगरभूंय । प्रतिनिधी
मुरगांवः भारतीय संस्कृती पुराय संवसारांत सगळ्यांत मुखार आसा. ती अशीच मुखार घेवन वचपा खातीर समाजीक संस्थांनी फुडाकार घेवचो. घुमट वादन म्हणल्यार गोंयकारपण, ही कला आमचे मायभुंयेची आशिल्ल्यान तिचो सांबाळ करपा खातीर तरणाट्यांनी फुडें सरून आमची लोककला सांबाळची, असो उलो वास्को पुलीस स्टेशनाचे निरिक्षक कपील नायक हांणी मारलो.
वास्कोच्या मुरगांव हिंदू समाज श्री महालक्ष्मी पुजन उत्सव समिती वतीन दिवाळी निमतान मुरगांव म्हाल मर्यादीत दुसरी घुमट आरती सर्त घेतिल्ली. ताच्या इनामां भेटवण सुवाळ्यांत नायक मुखेल सोयरे म्हूण उलयताले. ह्या वेळार माचयेर समितीचे कार्याध्यक्ष शेखर खडपकार, मुरगांवचे नगरसेवक विनोद किनळेकार, उद्देजक चंद्रकांत गांवस, उद्देजक उमेश साळगांवकार, समाजाचे जोडसचीव शैलेंद्र गोवेकार, जोडभांडारी दामू कोचरेकार, वांगडी विजय नागवेंकार, संतोष केरकार हाजीर आशिल्ले.
घुमट वादन ही परंपरीक लोककला. तातूंत पुराय गोंयचे संस्कृतीचें दर्शन जाता. हे खातीर समाजीक संस्थांनी आनी तरणाट्यांनी हे संस्कृतीचो सांबाळ करून ती तिगोवन दवरचे खातीर यत्न करचे, अशें नायक हांणी सुचयलें.
घुमट आरती सर्तींतले जैतिवंत फुडें दिल्ले प्रमाण. पयलें इनाम- श्री राष्ट्रोळी दामोदर घुमट आरती मंडळ वास्को, दुसरें- श्री त्रिमुर्ती घुमट आरती मंडळ सडा मुरगांव आनी तिसरें इनाम- श्री दामोदर आरती मंडळ कासावली. ह्या पंगडांक मानेस्तां हस्तुकीं इनामां भेटयलीं. सर्तीचें उक्तावण वास्कोचे आमदार कृष्णा साळकार हांचे हस्तुकीं जालें.
उक्तावण सुवाळ्याक आमदारा सयत समाजाचे भांडारी प्रताप गांवकार, वांगडी प्रकाश गांवस, आदले उपाध्यक्ष आत्माराम नार्वेकार, आदले वांगडी विनायक घोंगे, भरत कोलगांवकार आनी हेर पदाधिकारी हाजीर आशिल्ले. घुमट आरती सर्तीचें परिक्षण कपील गांवस आनी जय परब हांणी केलें. संतोष केरकार हांणी सुत्रसंचालन केलें जाल्यार शैलेंद्र गोवेकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
