भांगरभूंय | प्रतिनिधी
गोंय भारताचे माणकुलें सोबीत सुंदर राज्य. ल्हान आसुनूय बी गोंयची किर्ती जगभर पातळ्ळ्या. धवी फुल्लदर्यावळेरी देशी-विदेशी पर्यटकांक भुरळ घालता. फेसाळ दर्या सगल्यांक आकर्शीत करता.देखुनच आनंद लुटपाक लोक गोंया मुजरत येतात. सैमा सारकेच मोवाळ, शांतताप्रीय,प्रामाणीक म्हण गोंयकार नामनेक पावला. पर्यटन गोंयचो मुखेल उत्पनाचें स्त्रोत आशिल्ल्यान आंतरराष्ट्रीय पर्यटक हांगा येवपाक लागले.
विदेशी पर्यटक येतना आपल्या चैनीक घुंवळे वखदां घेवन आयलो. गोंय म्हळ्यार खा, पी आनी मजा कर अशें चित्र आमी रंगयलें. तांकां जाय ती मेकळीक दिली. सुरवेक ते कांय सुवातांनीच राबितो करताले. समाजांत मिसळप जायनासलें. गोंयकार लेगीत तांकां त्रास दिनासलें. ल्हवू ल्हवू करून ते गोंयकार समाजाच्या संपर्कांत येवपाक लागले, संबंध वाडले आनी इश्टागत वाडपाक लागली. तांणी हाडिल्ल्या घुंवळें वखदां पासून गोंयकार कसो पयस रावत?
गोंयकारां परस देशी पर्यटक तांकां पळोवन चडूच भुल्लुसूंक लागले. पोट भरपाक तांच्या फाटल्यान-फुडल्यान नाचपाक लागलें. मसाज करपाक, कपडे, फळां, आडसरां विकपाक घोळक्यांनी फिरपाक लागले. हें करताकरता घुंवळे वखदां हाताळपाक लागले. घुंवळे वखदां विकून पयसो खूब मेळटा हाका बळीपडले. आयज तर ही वखदां सेवन करपाक फाटीं रावले नात.
इतलें दीस तरणाटेच वखदां घेताले पूण आतां तर स्कुलातलीं ल्हान- ल्हान भुरगीं ताच्या विळख्यांत आयलीं. तांचे सेवन करतकूच तांचे बळ वाडटा आनी मेंदवा वेलो ताबो सुट्टा. मागीर तो हैवाना भशेन वागूंक लागता. कांय वर्सां फाटी पर्वरे भरदिसा घडिल्ली एक घडणूक सगल्यांनीच अणभवल्या. आयज पुलीस धाडी घालून तांकां अटक करतात ते दीसपट्टे खबरापत्रांनी वाचूंक मेळटा. नायजेरियन वा इतर देशी-विदेशी नागरिकांचो आस्पाव जरी आसलो, तरी गोंयकारांचो आस्पाव हुस्को करपा सारको आसा हांतूत दुबाव ना.
कांय देशी लोक कामांनिमतान हागांच स्थायीक जाले. आयज हें पुर्विल्लें गोंय अार्विल्ल्या गोंयांत परिवर्तीतजालां. ‘अतिथी देवो भव’ म्हणत इतली मेकळीक दिली की ते सगले आमच्याच माथ्यार बसले.बसले न्हय मतांच्या सुवार्थाक लागून बसयले. ‘भटाक दिली ओसरी भट हात पाय पसरी’ तशें तांणीपांय दलदलीन घट्ट पातळायल्यात. घुंवळे वखदां हाताळपी दलाल लेगीत खूब मातिल्ले आसूंयेता. तांच्या धाग्या-दोऱ्यांनी खूब खोलाय गांठल्या आसुये. हीं पाळां- मुळां विदेशांत पातळ्ळ्यात. अशेंय कानार पडटा.
गोंयच्या दर्यावेळीर नार्कोटीक आनी सायक्रोट्रोपीक जाल्यार गांवांत गांजा गाजता. हीं वखदां खंय गोंयांत महाराष्ट्र आनी कर्नाटक वाटेन येतात. तशेंच एलएसडी, कोकेन विमान वा बोटींतल्यान गोंयांत पावता, जाल्यार गांजा उत्तर आनीपूर्व भारतांतल्यान रेल्वे मार्गान पावता अशें म्हणटात. गोंयूच न्हय तर भारतांत ही एक लागिल्ली कीड आसा. सदृढ भारताचें सपन पुराय करपाक आमचो तरणाटे सृदढ जाय. देखुनूचहाचे आड सरकारान कडक कारवाय करप काळाची गरज आसा. खोल पाविल्ली पाळां-मुळांच उखडून तरणाट्यांक सशक्त करपा जाय. तरणाटो आमचें भवितव्य. भाशणां करून कांयजावचे ना, कृती करप होच एकमेव पर्याय सरकारान आपणावन सदाकाळ चालू दवरूंक जाय.
तेजस्वी अनील कामत
ग्रंथपाल, श्रीसरस्वती वाचानालय
माडेल-थिवी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
