भांगरभूंय | प्रतिनिधी
दिवचल पुलिसां वतीन ड्रग्स विरोधी जागृती रॅलीचें आयोजन
दिवचल: प्रधानमंत्री नरेंद्र मोदी हांणी नशा मुक्त भारताचो संकल्प करतनाच गोंयांतूय ‘नशा मुक्त गोवा’ हो संकल्प १००% चालीक लावपाचो सरकार यत्न करता. कांय पयशां खातीर तरणाट्यांनी ड्रग्स तस्करी तशेंच घुवळे वखदांच्या वेसनांत घुस्पचें न्हय. तशेंच आपली फुडली जीण सुखी समाधानी करपा खातीर पुरायेन वेसना पसून पयस रावचें. घुवळे वखदां आड जागृताय करपा खातीर तरणाट्यांनीच फुडाकार घेवन पालकांच्या सहकार्यान वेसनाची घातकी प्रवृत्ती चिड्डून उडोवपा खातीर एकठांय येवन यत्न करचे, अशें मुख्यमंत्री डॉ. प्रमोद सावंत हांणी म्हणलें.
अँटी नार्कोटीक सेल वतीन राज्यांत विवीध सुवातांचेर घुवळे वखदां विरोधी मोहीम सुरू आसा. दिवचल पुलीस स्टेशनाचे निरीक्षक विजय राणे आनी तांचे टिमीन दिवचले पुराय दीस विशेश रॅली तशेंच जागृती शिबिराचें आयोजन केल्लें. ह्या वेळार मुख्यमंत्री डॉक्टर प्रमोद सावंत हांणी ड्रग्स विरोधी रॅलीक बावटो दाखोवन रॅलीचें उक्तावण केलें.
पुराय गोंयांत नार्कोटीक सेला वरवीं पुलीस अधीक्षक सुनिता सावंत आनी तांची टीम घुवळे वखदां आड विशेश मोहीम राबोवन काम करता.
दिवचल म्हालांतल्या पुलिसांनीय घुवळे वखदां विरोधी मोहीम सुरू करतना नशा मुक्त गोंय येसस्वी जावपा खातीर यत्न चलयल्यात. ह्या निमतान जायत्यो कार्यावळी सुरू आसात. तरणाट्यांनी ह्या कांय पयशां खातीर हे घुवळेंत व्हांवून वयचें न्हय. हाची खास जापसालदारकी पालिकेन घेवप गरजेचें.
खंयचेंय पार्सल एके कडल्यान दुसरे कडेन व्हरपा खातीर शेकड्यांनी रुपया दितात, तेन्नाच हे विशींचो धोको वळखप गरजेचें. तरणाट्यांनी शिटूक रावचें असो उलो मुख्यमंत्र्यान मारलो.
ह्यो सगल्या गजाली आतांचे पिळगेच्या लक्षांत येवप गरजेचें. हाका पालक तशेंच विद्यार्थी, शिक्षक आनी समाजाच्या विवीध घटकांनी विशेश जागृताय दवरप गरजेचें आशिल्ल्याचें तांणी मुखार सांगलें.
ड्रग्सा आड गोंय सरकार खर भुमिका घेवन कार्यरत आसा. मात कांय गांवगिर्या भागांत तशेंच दर्यादेग भागांत पयशांचे सुवादीन वतना तरणाटे ह्या नशेच्या आनी घुंवळे वखदांच्या वेसनाक लागता. ही वृत्ती चिड्डून काडपाचें सामर्थ्य समाजांतल्या सगल्या घटकांनी दाखोवपाची गरज मुख्यमंत्र्यांनी उक्तायली.
ह्या वेळार मुख्यमंत्र्यांनी पुलीस अधिकारी विजय राणे आनी टिमीक परबीं भेटयलीं.
पुलीस टिमीन जागृती रॅली, तशेंच पुराय दीस शाळा, महाविद्यालयांत शिबिरांचें आयोजन करून घुवळे वखदां आड विशेश मोहीम राबयल्ले खातीर मुख्यमंत्र्यांनी तांकां परबीं भेटयलीं.
ह्या वेळार निरीक्षक विजय राणे हांणी घुंवळे वखदां विरोधी रॅली आनी जागृती मोहीम विशीं म्हायती दितना सगल्या गटांनी हे मोहिमेंत वांटेकार जावन ‘नशा मुक्त गोवा’ करपा खातीर सहकार्य करपाचो उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
