भांगरभूंय | प्रतिनिधी
पणजी: गोंयांत घुंवळे वखदांच्या संबंदीत गुन्यांवांनी थळाव्यांचो वांटो वाडत आसा. 2021 ते 2025 ह्या पांच वर्सांत घुंवळे वखदांच्या संबंदीत गुन्यांवांनी अटक जाल्ल्या थळाव्यांची संख्या दुपेटीन वाडल्या. गोंय पुलिसांनी 2021 वर्सा घुंवळे वखदांच्या संबंदीत गुन्यांवांनी 29 थळाव्यांक अटक केल्ली. 2025 वर्सा ही संख्या वाडून 76 जाली. वयल्या काळांत अशा गुन्यांवांनी हेर राज्यांतले तशेंच विदशी नागरिकांच्या अटकेचे प्रमाण लेगीत वाडलें.
मेळिल्ले म्हायती प्रमाण 2021 वर्सा पुलिसांनी घुंवळे वखदांचे संबंदीत 121 खटले दाखल जाल्ले. हातूंत वट्ट 138 जाणांक अटक केल्ली. हातूंत 29 थळावे, 87 हेर राज्यांतले जाल्यार 22 विदेशी नागरीक आशिल्ले.
2022 वर्सा 154 खटल्यांत 190 जाणांक अटक जाली. हातूंत 57 थळावे, 104 हेर राज्यातले आनी 29 विदेशी नागरीक आशिल्ले. 2023 वर्सा 140 खटल्यांत 165 जाणांक अटक जाली. हातूंत 47 थळावे, 98 गोंया भायले आनी 21 विदेशी नागरीक आशिल्ले.
गोंय पुलिसांनी 2024 वर्सा घुंवळे वखदांचे संबंदी 162 खटले दाखल केल्ले. हातूंत वट्ट 192 जाणांक अटक केल्ली. हातूंत 55 थळावे, 113 गोंया भायले जाल्यार 24 विदेशी नागरीक अशिल्ले. जाल्यार 2025 वर्सा 163 खटल्यांत 213 जाणांक अटक केल्ली. हातूंत 76 थळावे, 195 हेर राज्यांतले आनी 32 विदेशी नागरीक आशिल्ले.
फाटल्या पांच वर्सांत पुलिसांनी सुमार 146 कील घुंवळे वखदांचो विलो लायलो. हातूंत सगल्यांत चड 2025 वर्सा 75 कील घुंवळे वखदांचो विलो लायलो.
30 टक्के गुन्यांवकार थळावे
मेळिल्ले म्हायती प्रमाण पांच वर्सांच्या काळांत अटक जाल्ल्या वट्ट 898 आरोपीं पैकीं 264 (29.40 टक्के) थळावे आशिल्ले. 507 (56.45 टक्के) हेर राज्यातले जाल्यार 128 (14.25 टक्के) विदेशी नागरीक आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
