भांगरभूंय | प्रतिनिधी
पणजी : घुंवळे वखदांची समस्या ही फकत गुन्यांवकारी स्वरूपाची न्हय. ती समाजीक, मानसीक आनी भलायकेची समस्या अशें प्रतिपादन सरन्यायाधीश न्या. सूर्य कांत हांणी केलें. आयतारा राज्य विधी सेवा प्राधिकरणा वतीन आयोजीत घुवळे वखदां विरोधी जागृती मोहिमेच्या समारोप सुवाळ्यांत ते उलयताले.
ह्या वेळार मुख्यमंत्री डॉ प्रमोद सावंत, न्या. जे के महेश्वरी, न्या. मनमोहन, न्या. चंद्रशेखर, न्या. सुमन श्याम, न्या. वाल्मिकी मेनेझिज आनी हेर अधिकारी हाजीर आशिल्ले.
सरन्यायाधीश सूर्य कांत हांणी सांगलें, गोंय विधी सेवा प्राधिकरणाच्या जागृती मोहिमेन घुवळे वखदांची समस्या फकत दंडात्मक स्वरूपाची न्हय हें सिद्ध केलां. घुवळे वखदां हें खंयचोच आवाज करिनासतना जिणेंत, समाजांत रिगून ताका उध्वस्थ करता. हे विशीं विद्यार्थी, पालक, शिक्षक तशेंच हेर सगल्यांनी आपली भुमिका कितें आसची हे समजून घेवप गरजेचें. विधी सेवा प्राधिकरणान सुरू केल्ली घुवळे वखदां विरोधी जागृती मोहीम हेर राज्यांनीय सुरू करप गरजेचें.
मुख्यमंत्री डॉ. प्रमोद सावंत हांणी म्हणलें, राज्य सरकार घुवळे वखदां विशीं कसलेच तरेची तडजोड करिना.
सरकार घुवळे वखदां आड खर धोरण राबयता. घुवळे वखदां आड जागृती मोहीम, धडक कृती ह्यान फुडेंय सुरू आसतली. नशा मुक्त आनी सुरक्षीत गोंयां खातीर सगल्यांनी सामुहीकयत्न करप गरजेचें. ही आपल्या सगल्यांची सामुहीक जापसालदारी.
करुणे बगर न्याय म्हळ्यार जुलूम
न्या. सूर्य कांत हांणी सांगलें, म्हजे चाळीस वर्सांचे कारकीर्दीत न्यायदान पद्धतींतले बदल पळयल्यात. म्हाका समजलां, न्याय दितना करुणा, दया आसप गरजेचें. करुणे बगर न्याय हो अन्याय आसता. तशेंच न्याया बगरची करुणा बोवाळ जाता.
गोंयचो आत्मो फकत इमारतींनी ना. हांगच्या नागरिकां मदींय आसा. हांगच्या लोकांच्या डीएनऐंत उमेद, सौंदर्य आसा. स्वताचें दायज राखप, आपले वेगळे वळखीचो अभिमान आसप ही गोंयची वळख आशिल्ल्याचें सरन्यायाधीय सूर्य कांत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
