भांगरभूंय | प्रतिनिधी
नवी दिल्ली, खबरां संस्था ः सोमारा देशांतल्या एप्रील म्हयन्याचे किरकोळ म्हारगायचे आंकडे जाहीर जाले. ह्या आंकड्यां प्रमाण सध्या देशांत फकत 0.02 टक्क्यांनी म्हारगाय उणी जाल्या. मेळिल्ले म्हायती प्रमाण देशांत घावूक म्हारगाय वाडल्या. देखूनच रांदचे कुडींतल्यो वस्तू आनी धान्न म्हारग जाला.
वाणिज्य आनी उद्देग मंत्रालयान जाहीर केल्ल्या आंकडेवारी प्रमाण देशांत पेट्रोल-डीझेल, रांदपाचो गॅस आनी वीज म्हारग जाल्यात. अन्नधान्य, खास करून भाजीपालो लेगीत म्हारग जाला. मार्च 2024 वर्सा घावूक म्हारगाय 0.53 टक्के आशिल्ली. पूण एप्रील म्हयन्यांत घावूक म्हारगाय दर 1.26 टक्क्यांचेर पावला. फाटल्या वर्सा एप्रील म्हयन्यांत घावूक म्हारगाय दर 0.79 टक्के आशिल्लो.
इंधन, वीज म्हारग जाले
एप्रील म्हयन्यांत अन्नधान्याचे म्हारगाय दर 7.74 टक्क्यांनी वाडले. मार्च म्हयन्यांत हें प्रमाण 6.88 टक्के आशिल्लें. एप्रील म्हयन्यांत भाजयेचें म्हारगाय दर 23.60 टक्के आशिल्लें. मार्च म्हयन्यांतय हें प्रमाण 19.52 टक्के आशिल्लें. अशेच तरेन इंधन आनी वीज हांचोय म्हारगाय दर वाडलो. एप्रीलांत वीज चलनवाडीचें प्रमाण 1.38 टक्के आशिल्लें. मार्च म्हयन्यांतय हें प्रमाण 0.77 टक्के आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
