भांगरभूंय | प्रतिनिधी
अन्न आनी वखदां खात्याची कारवाय
मडगांव: नावेली खैबर फॅमिली रॅस्टोरंण्टाचेर अन्न आनी वखदां खात्याच्या अधिकाऱ्यांनी कारवाय केली. ह्या रॅस्टोरंण्टांत घाणयाऱ्या वातावरणांत अन्न तयार करीत आशिल्ल्यान अधिकाऱ्यांनी हें रॅस्टोरंण्ट बंद केलें. तशेंच वाठारांतल्या आनीक तीन रॅस्टोरंण्टांचीय तपासणी केली.
अन्न आनी वखदां खात्यान सद्या व्हड प्रमाणांत हॉटेल, रॅस्टोरंण्ट, स्टॉल्साची तपासणी सुरू केल्या. अन्न आनी वखदां खात्यान मंगळारा आंब्यांची तपासणी केल्ली. कॅमिकला वरवीं आंबे पिकोवन ते विकत आशिल्ल्याचें मुखार आयले उपरांत मडगांवांतल्या गांधी माकेंद्रांतले दोन आनी सोनसडो आनी नावेलीतलें दरेकी एक अशा चार गुदांवांतले आंबे तपासणी खातीर घेतिल्ले. तशेंच केळी पिकयतल्या मडगांव, नावेली आनी सां जुझे दी आरियाल हांगासल्या गुदांवांचीय पळोवणी केली तेन्ना अधिकाऱ्यांक कॅमिकल सांपडलें ना.
बुधवारा सांजवेळा अधिकारी संज्योत कुडाळकार हांचे सयत अन्न आनी वखदां खात्याच्या अधिकाऱ्यांनी नावेली जंक्शना कुशीच्या रॅस्टोरंण्टाची तापसणी केली. ह्या वेळार खैबर फॅमिली रॅस्टोरंण्टाचे रांदचेकुडींत घाणयारें वातावरण दिसून आयलें. घाण उदक रांदचेकुडींतूच सोडून दिल्ल्यान तशेंच अन्न शिजोवपा खातीर योग्य वातावरण नाशिल्ल्याचें दिसून आयलें. ताका लागून अधिकाऱ्यांनी रॅस्टोरंण्ट बंद करपाचो निर्णय घेतलो.
सदर रॅस्टोरंण्टाच्या धनयाक नितळसाण आनी हेर कामां खातीर पांच दिसांची मुजत दिल्या आनी उपरांत अन्न आनी वखदां खात्याचे अधिकारी पळोवणी करतले आनी उपरांतूच रॅस्टोरंण्ट सुरू करपा विशीं निर्णय घेतले अशी म्हायती अधिकारी संज्योत कुडाळकार हांणी दिली.
मजगतीं, वाठारांतल्या आनीक तीन रॅस्टोरंण्टाचीय पळोवणी केल्या आनी गरजेच्यो त्यो सुचोवण्यो केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
