भांगरभूंय | प्रतिनिधी
मुख्याधिकाऱ्यां आड अवमान याचिका करतले दाखल
म्हापशें: घाटेश्वरनगर खोर्ले बेकायदो रितीन कार्यरत आशिल्ल्या गाळेवजा दुकानां पैकीं दोन दुकानां म्हापशें पालिकेन सील केलीं. दुकानदार तशेंच थळाव्यांच्या हस्तक्षेपाक लागून ही कारवाय थांबोवन पालिका पंगडाक परतून वच्चें पडलें. पालिकेचे हे कृती खातीर लवादा कडेन अवमान याचिका दाखल करपाचाे निर्णय दुकानदारांनी घेतला.
म्हापशें- आसगांव रस्त्या वेल्या घाटेश्वरनगर हांगासरल्या ह्या गाळेवजा दुकानांची पालिकेच्या कनिश्ठ अभियंत्यांनी पालिका निरिक्षक आनी सहकारी कर्मचाऱ्यां सयत पळोवणी केल्ली. त्या वेळार हीं दुकानां पालिकेच्या वेपार परवान्या बगर कार्यरत आशिल्ल्याचें दिसून आयिल्लें. उपरांत पालिकेन ह्या दुकानांच्या धनयांक कारणां दाखय नोटीस दिल्ली.
तशेंच फाटल्या सप्टेंबर 2024 म्हयन्यांत हांगा आशिल्लीं वट्ट 22 गाळेवजा दुकानां पालिकेन सील केल्लीं. तातूंतलीं आठ दुकानां पालिकेन सुनावणी उपरांत मातयेभरवण करपाचो निर्णय घेतिल्लो. उपरांत ह्या दुकानदारांनी प्रशासकी लवादा कडेन दाद मागली तेन्ना तांकां कारवाये पसून स्थगिती मेळिल्ली. उपरांत पालिकेन ह्या दुकानांचे कुलप काडिल्लें.
शुक्रारा 7 वेर दनपारां पालिका मुख्याधिकाऱ्यांच्या आदेशान परतून पालिका पंगड ह्या दुकानांक कुलप मारपाक गेले. तेन्ना दुकानदारांनी हे कारवायेक आक्षेप घेतलो. तरी लेगीत पालिका कर्मचाऱ्यांनी दोन दुकानां सील केलीं. उपरांत दुकानदार तशेंच थळाव्यांच्या विरोधाक लागून पालिका पंगडाक कारवाय अर्द्यार सोडून परतून वच्चें पडलें.
घाटेश्वरनगरांतलीं सगलीं दुकानां मोडून उडोवपाच्या आदेशाक प्रशासकी लवादा कडल्यान स्थगिती मेळ्ळ्या. हे प्रकरण न्यायप्रविश्ठ आसून लेगीत पालिकेन हीं दुकानां सील करपाचो यत्न केलो. पालिका मुख्याधिकारी चंद्रकांत शेटकार हांच्या विरोधांत लवादा कडेन अवमान याचिका दाखल करपाचो निर्णय घेतिल्ल्याची म्हायती दुकानदारांनी घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
