भांगरभूंय | प्रतिनिधी
म्हापशें पालिकेची 11 दुकानांचेर कारवाय
म्हापशें: घाटेश्वरनगर, खोर्ले बेकायदो कार्यरत आशिल्ल्या गाळेवजा दुकानां मदलीं 11 दुकानां म्हापशें पालिकेन सील केलीं. हांगा आशिल्ल्या ह्या दुकानांचेर फाटल्या स म्हयन्यांत सील करपाची ही तिसरी घडणूक.
मंगळारा 25 वेर सांजवेळा पालिका मुख्याधिकाऱ्यांच्या आदेशा प्रमाण कनिश्ठ अभियंतो सुभा आमोणकार, मंथन कासकार, पालिका निरिक्षक प्रज्वल धारगळकार, वरिश्ठ कारकून निलेश लिंगुडकार, अनील नायक आनी वामन पवार ह्या पंगडान पुलीस बंदोबस्तांत हीं 11 दुकानां सील केलीं. गोंय नगरपालिका कायदो आनी वेपार आनी वेवसाय परवानो उपनेमांचें उल्लंघन केल्ल्या प्रकरणांत पालिके कडल्यान ही कारवाय जाल्या.
ताचे पयलीं फाटल्या सप्टेंबर 2024 वर्सा रस्त्याचे कुशीक आशिल्ल्या ह्या 22 गाळ्यांक पालिकेन तीं बेकायदो आशिल्ल्याचें कारण मुखार करून सील मारिल्लें. हातूंतलीं आठ दुकानां मोडपाचो निर्णय घेतिल्लो. उपरांत संबंदितांनी प्रशासकी लवादा वतीन हे कारवायेक स्थगिती मेळयली तेन्ना पालिकेन सगल्या दुकानांचे सील काडिल्लें.
उपरांत 16 दुकानांक निमाणी नोटीस काडून फाटल्या 7 फेब्रुवारी 2025 दिसा दुकानां सील करपाची कारवाय हातांत घेतिल्ली. पूण दुकानदारांनी हस्तक्षेत केल्ल्यान फक्त दोनूच दुकानांक कुलप लावन पालिकेचो पंगड परतून गेल्लो. उपरांत हें सील लेगीत स दिसां भितर पालिकेन काडिल्लें. आतां तिसरे फावटी ह्याच दुकानांचेर सील मारपाची कारवाय केल्या.
पालिकेचे हे कारवायेचेर दुकानदारांनी निरशेणी उक्तायल्या. कारण तांकां तांचे सामानूय भायर काडपाक दिले ना. म्हापशें शारांत खूबशीं बेकायदो कृत्यां सुरू आसात. तशेंच हावसींग बोर्डांतल्या दुकानांक हात लायनात. पूण फक्त घाटेश्वरनगरांतल्या दुकानांक लक्ष्य करतात असो आरोप ह्या दुकानदारांनी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
