भांगरभूंय | प्रतिनिधी
दक्षीण गोंय जिल्लोधिकार्याचो आदेश
मडगांव : फाटल्या दोन दिसां सावन सेगीत पावस झडतूच आसा. हाका लागून घसघश्यांचेर, न्हंयांच्या उदकाच्या प्रवाहाक नेट आयला, खणींचेर मारिल्ल्या फोंडकुलांनी उदक भरलां. हेच फाटभूंयेर दक्षीण गोंयची जिल्लोधिकारी एग्ना क्लिटस हांणी शुक्रारा जिल्ह्यांतलो कायदो आनी सुवेवस्थेचो आढावो घेतलो. हे बसकेंत तांणी घसघशे आनी बंद पडिल्ल्या चिरे खणींनी फोंडकुलां पडिल्ल्या वाठारांत प्रवेश करप्यां आड खर कारवाय करपाचे आदेश पुलीस आनी तलाठ्यांक दिले.
हे बसके वेळार साबार विशयांचेर चर्चा जाली. हातूंत वास्को दामबाबाचें सप्तक, स्वतंत्रताय दीस आनी हेर कायदो, सुवेवस्था हांचो आसपाव आशिल्लो. दक्षीण गोंयांत प्रेक्षणीय थळां आशिल्ल्या घसघश्यांचेर आनी उदकाच्या थळांचेर गोंयकार आनी पर्यटकांची वाडिल्ली गर्दी, तशेंच अपघातांच्या घडणुकांक लागून प्रशासनान ह्यान पयलींच प्रवेशाचेर बंदी घालपाचे आदेश लागू केल्यात. विशेश म्हणल्यार शेनवार-आयतारा ह्या सुवातांचेर गस्त वाडोवपाचे निर्देश पुलिसांक दिल्यात. आदेश पाळिनाशिल्ल्यांचेर पुलिसांनी आतां मेरेन दोन गुन्यांव नोंद केल्यात, अशी म्हायती जिल्लोधिकारी क्लिटस हांणी दिली.
हे बसकेंत जिल्ह्यांतल्यो धिरयो आनी रेंव उसपपा विशीं उच्च न्यायालयान दिल्ल्या निर्देशांचे अंमलबजावणी विशींय चर्चा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
