घसघशांचेर सुरक्षा रक्षकांची नेमणूक करची

भांगरभूंय | प्रतिनिधी

गोंयांतल्या हेर म्हालांनी पावसाच्या दिसांनी घसघशे खूबशे कडेन व्हांवतात. आर्विल्ल्या काळांत पावसाळी पर्यटन ही संकल्पना बरीच वाडल्या. गोंयचे तशेंच गोंया भायले भोंवडेंकार गांवगिऱ्या वाठारांतल्या अटंग्या रानांतल्या घसशाचो गुगलाच्या आदारान सोद घेवन थंय पावतात. मात तांकां त्या वाठारांतल्या घसघशा विशींची पुराय म्हायती आसना.

नेत्रावळी, सांगें अभयारण्यांत मैनापी ह्या घसघशार पावसाळी पर्यटन करपाक आयिल्ले दोग जाण बुडून मरण येवपाची दुर्दैवी
घडणूक आयतारा सांजेर 3 वरांचेर घडली. ही खबर आयकून नेत्रावळी गांवांत दुख्खाची सया पातळ्ळी. घसघशांतल्या उदकांत उडी मारपी वास्कोचो शिवदत्त नायक (28) हो बुडटा तें पळोवन ताका वाटावपाक म्हापशेंच्या जनार्दन सडेकार (55) हाणेंय उदकांत उडी मारली. पूण ताकाय काळान सोडलो ना. नेत्रावळे ह्याच घसघशार उदकांत बुडून मरण येवपाची ही पयलींच घडणूक न्हय, तर हाचे पयलीं लेगीत तीग जाण बुडून मरण येवपाची घडणूक घडल्या.
नेत्रावळी पंचायत वाठारांत आशिल्ल्या अटंग्या रानां भितर मैनापी, सांवरी, उदेंगी नांवांचें गोंय पर्यटन नकाशार आयिल्ले तीन घसघशे आसात. बाराय म्हयने उदकान व्हांवपी ह्या घसघशांचो आंनद लुटपाक देश, विदेशांतल्या पर्यटकांचीं भिरीं शुक्रार, शेनवार आनी आयतार ह्या दिसांनी व्हड प्रमाणांत भेटी दितात. मैनापी आनी सांवरी ह्या दोनूय घसघशार पर्यटक बुडून मरण येवपाची आतां मेरेन आठा वयर प्रकरणां घडल्यांत. तरी पूण गोंय पर्यटन खात्यान पर्यटकांचे सुरक्षे खातीर कसलीच उपाय येवजण केल्ली ना म्हणून थळावे लोक सरकाराचेर तिडक काडटात. नेत्रावळी अभयारण्य अखत्यारीत आशिल्लो मैनापी हो घसघसो नेत्रावळी रान खात्याच्या मुखेल चेक नाक्याच्या दरवट्या कडल्यान सुमार 5 किलो मिटर अंतराच्या दोंगरार आसा. मुखेल रस्त्या वयल्यान आड वाटेन ह्या घसघशार सादारण चलून वचपाक 45 मिणटांची वाट. पावसाच्या दिसांनी पर्यटन करपाक देशी विदेशी पर्यटक व्हड प्रमाणांत आपल्या कुटुंबा सयत पिकनीक मनोवपाक येतात. मात फेसाळ वयल्यान पडपी घसघशाचें उदक पळोवन जंय उदक पडटा त्या कोंडींतल्या उदकांत उडी मारपाचो मोह जाता, पूण कोणूच ताची खोलाय पळयना, आनी पेंवपाक नकळो आशिल्ल्या कारणान जिवाची वाट लावन घेतात.
आयतारा ज्या दोगांक बुडून मरण आयलें तातूंतलो एकलो खंय पेंवपाक फिशाल आशिल्लो. जरी कितलोय पेंवपाक फिशाल आसलो तरी दोन माड उंचाये वयल्यान रकतल्या उदकाच्या खोलायेचो थाव मेळप आनी उदक पडटल्या भोवऱ्यांत घुस्पल्यार बुडून मरपाची शक्यताय न्हयकारूंक येना. नेत्रावळी अभयारण्यांत वचपाक नेत्रावळी रान खात्याचो एक चेक नाको आसा. ह्या चेक नाक्यार दर मनशा फाटल्यान शंबर रुपया आनी एका वाहनाक शंबर रुपया इतलो संबंदीत खात्याच्या नेमा प्रमाण शुल्क भरचो पडटा. घसघशार भेटी दिवपी पर्यटक चडशे गोंयकार आपल्या कुटुंबां सयत, नाजाल्यार ऑफिसांतल्या इश्टां वांगडा वीक एण्ड मनोवपाक येतात. येतना सैमाच्या गोपांत मजा करपा खातीर जेवपाचो, पियेवपाचो बेत करुनूच येतात. दोंगरा वयल्यान कोसळपी घसघशार वतना शितीद राखपाचें चड गरजेचें आसा अशें म्हाका दिसता. कारण घसशाच्या उदका देगेर पाशाणी फातरार पावसाच्या दिसांनी निसरट जाल्ली आसता, आनी असल्या फातरार उडक्यो मारून मस्ती केल्यार निसरून खोल कोंडांत पडून अपघाती मरण येवपाची श्यक्यताय न्हयकारूं येना.
गोंयांतल्या हेर म्हालांनी पावसाच्या दिसांनी घसघशे खूबशे कडेन व्हांवतात. आर्विल्ल्या काळांत पावसाळी पर्यटन ही संकल्पना बरीच वाडल्या. गोंयचे तशेंच गोंया भायले भोंवडेंकार गांवगिऱ्या वाठारांतल्या अटंग्या रानांतल्या घसशाचो गुगलाच्या आदारान सोद घेवन थंय पावतात. मात तांकां त्या वाठारांतल्या घसघशा विशींची पुराय म्हायती आसना.
आमच्या गोंयांत सोरो मुक्त उदक मेळटा. गोंय भर सोऱ्याचीं बार्रां, ठोक सोऱ्याचीं दुकानां पावला कणकणीं मेळटात. शार वाठारांतल्या भौशीक सुवातांनी सोरो पियेवपाक मनाय. तशेंच कोणूय सोरो पियेतना सांपडल्यार निर्धारीत दंड दिवपाचो कायदो केला. ही एक बरी गजाल आसली तरी भोंवडेकार केल्लो कायदो भिसक्यार मारून भौशीक सुवातींनी सोरो पियेवन रित्यो बाटल्यो, प्लास्टिकाचो कोयर करून अावतिकाय करतात.
खंयचीय घडणूक घडले उपरांत सरकाराचेर लोकांनी शेक काडप तशें सहाजिकूच. आतां आयतारा जी मैनापी घसघशार जी घडणूक घडली ताचो खोलायेन विचार केल्यार कमी चड प्रमाणांत हातूंत भितर पर्यटन खात्याचें तशेंच रानां खात्याचें सदळपण दिसून येता. नेत्रावळींतले घसघशे पर्यटकां खातीर कितले सुरक्षीत आसात हाचो पयली खात्यान अभ्यास करून नियाळ करप गरजेचें आसा. वयल्यान पडपी घसघशा लागीं सुरक्षेचे नदरेन लोकां खातीर स्पॉट विवींग पॉयंन्ट बांदून काडचो, आनी दिसाक 700 वयर भेट दिवपी पर्यटकांक न्हावपा पेंवपाक धोको आशिल्ल्या घसघशार संबंदितांनी पुराय म्हायती आशिल्लो फलक लावप गरजेचो आसा.
तशेंच जीव सुरक्षा रक्षकांची नेमणूक करून पेंवपा खातीर भाड्यान लायफ जॅकेट दिल्यार कांय अंशी बुडून मरपाच्यो घडणुको उण्यो जावंक शकतात. पिकनीक मनोवपाक वतना चडशे लोक सोरो वांगडा घेवन वतात. रानांनी आशिल्ल्या घसघशार पावतकूच सोरो पियेवन मस्ती करपाक लागतात. दर्यादेगेर जीव सुरक्षा रक्षक सोरो पियेवन पेंवपाक मनाय आशिल्ले शिमे भायर वतकूच धोक्याची पिल्लूक मारून सुचोवणी दिवन लेगीत सोऱ्याचें घुंवळे भितर धोक्याची शीम हुपिल्ल्यान दर्यांत बुडून मरण आयिल्ल्याच्यो खबरी आयकूकं, वाचूंक मेळटात. हाचे वेल्यान धोको आशिल्ल्या घसघशार जीव सुरक्षा रक्षकांचें गैरहाजेरींत पर्यटकांनी सोरो पियेवन उदकांत बूड मारपाची आदनेरी केल्यार कितलो अनर्थ घडूंक शकता ताची कल्पना केल्यार आगांर कांटो उबो रावता.
जेन्ना पर्यटक अभरण्यांत वचपाक येतात, त्या वेळार तांच्या सामानांची तशेंच गाडयेचीं पुलीस सुण्याचो उपेग करून पुराय झडटी घेवची. आनी दर एकल्या पर्यटकाक अाल्कोमिटर लावन तपासणी करची. जर कोणूय सोरो पियेल्लो सांपडल्यार तांकां अभयारण्यांत वचपाक मनाय करपाची तरतूद नेत्रावळी अभयारण्य रान खात्यान करपाक जाय अशें म्हाका दिसता.

सुदिन वि. कुर्डीकार
8275425404