भांगरभूंय | प्रतिनिधी
हणजुणें प्रकरणांत दोगांक अटकः जखमींचेर गोमॅकाँत उपचार
भांगरभूंय । प्रतिनिधी
म्हापशें: पिकेन- चिवार, हणजूण्यां पुर्वजांचें घर हडप करपा खातीर 15 ते 20 भाड्याच्या गुंडांच्या आदारान बापूय- पुताचेर खुनी हल्लो केलो. ह्या प्रकरणांत पुलिसांनी एकामेका आड गुन्यांव नोंद करून दोगांक अटक केली. ही घडणूक बिरेस्तारा सकाळीं 10.45 वरांच्या सुमाराक घडली.
फिर्यादी मेविल्टन थिओदोर (32. रा. गुमालवाडो हणजूणें) आनी ताचो बापूय टिम्मी थिओदोर हांचेर गोमॅकाँत उपचार चालू आसात. मेविल्टन हाचे कागाळेच्या आदारान हणजूणें पुलिसांनी दुबावीत दिगंबर नारायण साळकार (54. रा. धुळेर म्हापशें) आनी अखील सुरेश टेक्केकर (33. रा. कुचेली म्हापशें) ह्या दोगांक अटक केल्या.
फिर्यादी थिओदोर हांच्या पुर्वजांच्या घराचेर दुबावीत ब्रुनो डिसोझा (रा. मुंबय) हाणें दायज म्हूण दावो करून दिवाणी न्यायालयांत खटलो दाखल केल्लो. मात हालींच ताणें हो खटलो फाटीं घेतलो, जाल्यार फिर्यादी कुटुंबान त्या घरांत एका विदेशी जोडप्याक भाडेकार म्हूण दवरिल्लें. बिरेस्तारा सकाळीं दुबावीत ब्रुनो डिसोझा हो 15 ते 20 बावन्सरांक घेवन घडणुकेचे सुवातेर आयलो आनी ताणें भाडेकार विदेशी कुटुंबाक सामाना सयत घरा भायर सरपाक सांगलें.
हो प्रकार विदेशी बायलेन घर धनी टिम्मी थिओदोर हांच्या कानार घातली. थिओदोर बापूय- पूत घडणुकेचे सुवातेर दाखल जाले. थंय आयले उपरांत दुबावितांनी तांकां दांड्यान मारबडय केली. हो प्रकार पळोवन विदेशी कुटुंब घर सोडून गेलें. ते उपरांत दुबावितांनी घराक कुलप लायलें. गंभीर जखमी थिओदोर बापूय- पुताक अॅम्ब्युलन्सींतल्यान गोमॅकाँत दाखल केले. थंय तांचेर उपचार चालू आसात. टिम्मी थिओदोर हांची भलायकी हुस्क्याची आसा. हे घडणुके उपरांत थिओदोर कुटुंबान हणजूणें पुलिसेंत धांव घेतली आनी कागाळ नोंद केली. हे कागाळेच्या आदारान पुलिसांनी दुबावीत ब्रुनो डिसोझा आनी ताणें हाडिल्ल्या 15- 20 भाड्यान हाडिल्ल्या लोकां आड खुनी हल्ल्याचो गुन्यांव दाखल केलो. जाल्यार ब्रुनो डिसोझा हाचे कागाळेच्या आदारान तांकां तशेंच तांची चली लाना आनी दिगंबर हांकां मारपेट केल्ल्याच्या आरोपा खाला अज्ञाता आड पुलिसांनी मारपेट केल्ल्याचो गुन्यांव नोंद केला.
मजगतीं, दुबावीत ब्रुनो डिसोझा हाणें 2023 त दायज म्हूण घराचेर हक्क दाखयल्लो. तशेंच ताणें न्यायालयांत दिवाणी खटलो दाखल केलो. मात फाटल्या 57 वर्सांत ते केन्नाच थंय येवंक नाशिल्ल्याचें सांगून थिओदोर कुटुंबान तांचो हो दावो भायर मारलो. पोरूं थिओदोर कुटुंबान डिसोझा हाचे आड हणजूणें पुलिशेंत सतावणुकेची कागाळ दाखल केल्ली. मात पुलिसांनी संबंदितांचेर कारवाय करूंक ना, अशें मारिया थिओदोर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
