भांगरभूंय | प्रतिनिधी
कुडचडें : घर विभागणी उपरांत कुटुंबांत जावपी वाद सोंपचे खातीर सरकारान घर विभागणीची प्रक्रिया सुरू केल्या. घराची विभागणी जाले उपरांत त्या घराक स्वतंत्र घर क्रमांक दिवपा सयत उदक आनी वीज जोडण्योय स्वतंत्रपणान दितले. अशे तरेचे अर्ज मेळ्ळे उपरांत १५ दिसांनी पंचायतींक विभागणी प्रमाणपत्र (पार्टिशन सर्टिफिकेट) दिवचें पडटलें, अशें परिपत्रक पंचायत खात्यान बुधवारा जारी केलां.
सरकाराच्या ह्या निर्णया उपरांत खुबश्या जाणांनी आपापल्यो प्रक्रिया उक्तायल्यात. घर विभागणी प्रमाणपत्र मेळप सुरळीत जावपाचें आशिल्ल्यान सरकाराच्या निर्णयाक खुबश्या जाणांनी येवकार दिलो. ‘घर विभागणी’ विशयाक गोंयच्या सगल्या पंचायतींक सरकारान कायदेशीर अधिकार दिल्ले खातीर लोकांनी सुटकेचो स्वास सोडला. फाटलीं कितलींशींच वर्सां आडकून आशिल्ली मागणी पुराय जाल्ले खातीर मुख्यमंत्री डॉ. प्रमोद सावंत हांचे सावड्डेंचे आदले सरपंच तशेंच मिराबागचे पंच वांगडी संजय नायक हांणी उपकार मानले.
सरकाराच्या ह्या निर्णयाक लागून जायत्या कुटुंबांक मजतीचो हात मेळटलो. अंत्योदय तत्त्वाचेर काम करपी भाजप सरकार आनी मुख्यमंत्री डॉ. सावंत चडूच विस्वासाक पात्र थारल्यात. ह्या निर्णयांतल्यान खुबश्या कुटुंबीयांक घर विभागणी प्रकरणांत मजत जातली. तशेंच जायत्यो समस्या सुटपाकूय मजत जातली. वीज जोडणी, नळ जोडणी हे विशय सुट्टले अशेंय मुखार पंच संजय नायक हांणी म्हणलें.
ह्यान पयलीं घर दुरुस्ती परवानो विक्रमी वेळार दिवपाचो आदेश मुख्यमंत्र्यानी राज्यांतल्या सगल्या पंचायतींक दिल्ल्यान अशा निर्णयाचे सगल्या थरांतल्यान येवकार जाल्ल्यान मुख्यमंत्र्याची तोखणाय करता. गरिबांतल्या गरीब परिवाराकूय अंत्योदय तत्त्वाक लागून नवी उभारी मेळटा. डॉ. प्रमोद सावंत हे दुरदृष्टी आशिल्ले मुख्यमंत्री आशिल्ल्यान आयज मेरेन प्रामाणीक काम करतना सगल्या घटकांक वांगडा घेवन वचपाची तांक तांचे मदीं आशिल्ल्याचें पंच संजय नायक हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
