भांगरभूंय | प्रतिनिधी
फुडले वेंचणुके मेरेन दर एकल्याचें घर नांवार जातलें
पणजी : म्हजें घर येवजण दर एकल्याच्या घरा मेरेन पावोवन फुडले वेंचणुके मेरेन दर एकल्याच्या नांवाचेर घर जातलें, अशें आस्वासन मुख्यमंंत्री डॉ. प्रमोद सावंंत हांंणी दिलां. घर नांवार जाल्यार विरोधकांच्या पोटांत कित्याक दुखता हे विशीं विरोधकांक प्रचारा वेळार जाप विचारपाचें आवाहन डॉ. सावंत हांणी केलें.
खोर्ली मतदारसंघाचे उमेदवार सिद्धेश श्रीपाद नायक हांच्या प्रचाराची सुरवात मुख्यमंंत्री सावंत हांचे हस्तुकी जाली. ह्या वेळार आमदार राजेश फळदेसाय, उमेदवार सिद्धेश श्रीपाद नायक आनी हेर कार्यकर्ते हाजीर आशिल्ले.
राज्यांत सध्या डबल इंजीन सरकार आसा. दोनूय जिल्लो पंचायतीचेर झेंडो लावन ते ट्रिपल इंजीन जावपाची गरज आसा. हाचे खातीर दरेकल्यान २० डिसेंबराक भाजप उमेदवाराक मत मारचे, अशेंं आवाहन डॉ. सावंत हांणी केलें.
भारतीय जनता पक्षाचे फुडारी वा उमेदवार हे पयशे करपाक राजकारणांत येवंक नात. ते जनतेची सेवा करपाक आयल्यात. हाका लागून गृह आदार, लाडली लक्ष्मी अश्यो कल्याणकारी येवजण्यो सुरू जाल्यात. गरिबांंच्या खात्यांत दर म्हयन्याक उण्यात उणे दोन हजार रूपया जमा जातात. कल्याणकारी येवजण्यो नेटान चालीक लावपा सयत उदरगती खातीर भाजपाक मतदान करपाचो उलो तांणी मारलो.
तीन न्हय ५० विरोधी पक्ष एकठांय आयले तरी भाजपाक कसलोच फटको बसचो ना. मुख्यमंत्री डॉ. सावंत हांंचे फुडारपणा खाला पक्षाची नेटान वाटचाल सुरू आसा. हाका लागून खोर्लीचे उमेदवार सिद्धेश श्रीपाद नायक हे व्हडा मतांंनी जैतिवंंत जातले असो विस्वास आमदार फळदेसाय हांंणी उक्तायलो. भाजपाक लागून लोकांची सेवा करपाची संंद आपणाक मेळ्ळी. ह्यान फुडेंं लेगीत जनसेवा करीत रावतलों, अशें सिद्धेश श्रीपाद नायक हांंणी सांगलें.
शांंतादुर्गा कुंभारजुवेकान्नीक पांयां पडून सिद्धेश नायक हांणी प्रचाराक सुरवात केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
