भांगरभूंय | प्रतिनिधी
सचिवांक परवानो दिवपाचे अधिकार : पंचायत कायदो दुरूस्ती विधेयक सभाघरांत
पणजी : घर वा बांदकाम दुरूस्तीच्या परवान्या खातीर आता पंचायत वांगड्यांक बसका घेवन थाराव घेवपाची गरज पडची ना. घर दुरूस्तीचो परवानो दिवपाचे अधिकार पंचायत सचिवांक दिवपाची तजवीज करपी पंचायत राज कायदो दुरूस्ती विधेयक सभाघरांत सादर जालां. पंचायत मंत्री मॉवीन गुदिन्हो हांणी हें विधेयक सभाघरांत सादर केलें.
पंचायत सचिवांक दुरूस्तीचो परवानो दिवपाचे अधिकार दिवपा खातीर पंचायत राज कायद्याच्या कलम ४७मदीं दुरूस्तीची तजवीज विधेयकांत आसा. तशेंच विवीध परवान्यां खातीर कालमर्यादा उणी करपाक विवीध कलमांनी दुरूस्ती जातली.
विवीध बांदकाम परवान्यां खातीर आशिल्ली ३० दिसांची मुजत १५ दीस जातली. हाका लागून ह्यान फुडें पंचायतींत बांदकाम परवानो अर्जाचेर १५ दिसांनी निर्णय घेवचो पडटलो. हे खातीर कायद्याच्या कलम ६६, उपकलम २, २ (ए) दुरूस्तीची तजवीज आसा.
ऑकुपन्सी दाखलो ४५ दिसांच्या जाग्यार १५ दिसांत दिवचो पडटलो. हे खातीर कलम ६६च्या उपकलम २ ई आनी २ एफ मदीं दुरूस्ती जातली. वेपारी परवानो दिवपाचो कालावधी १५ दिसांवेल्यान ७ दिसाचेर येतलो. अर्ज केल्या उपरांत वेपारी परवानो ७ दिसांनी दिवप बंदनकारक आसतलें. हे खातीर कलम ७२ उपकलम २ ए आनी २ बी मदीं दुरूस्ती जातली.
कुलूप लावपाचो अधिकार
पंचायतीचो परवानो नासताना वेवसाय सुरू आसल्यार त्या आस्थापनाक कुलूप लावपाचो अधिकार पंचायतींक मेळटलो. हाचे खातीर ७२ ए ह्या नव्या कलमाचो आस्पाव जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
