भांगरभूंय | प्रतिनिधी
गोवन सिनेमा विभागांत सेगीत पांचव्या वर्सां ‘सहित’चो आस्पाव
भांगरभूंय । खबरां मेज
पणजी : सहित स्टुडिओची निर्मिती आशिल्ल्या ‘घर’ ह्या कोंकणी लघुपटाची अंदूंच्या इफ्फींत गोवन सिनेमा- प्रिमियर विभागांत निवड जाल्या. मुख्यमंत्री डॉ. प्रमोद सावंत हांणी पत्रकार परिशदेंत निवड जाल्ल्या गोंयच्या चित्रपटांची निवड जाहीर केली.
पत्रकार किशोर अर्जुन हांणी हो लघुपट बरयला आनी दिग्दर्शीत केला. झिरो मायल्सस्टोन फिल्म्स, सृजन थिएटर्स, विकास प्रॉडक्शन्स हे ह्या ‘घर’ कोंकणी लघुपटाचें प्रस्तुतकर्ते आसात.
फाटल्या पांच वर्सां सावन ‘सहित’चे वतीन वेगवेगले विशय सिनेमाच्या पड्ड्यार हाडल्यात. हालींच जाल्ल्या गोंय राज्य चित्रपट महोत्सवांत सहितच्या ‘कुपांचो दर्यो’ ह्या लघुपटाक नॉन फिचर्स विभागांतले सगल्याचे सगले स पुरस्कार फावो जाल्यात. सहितच्या सगल्या कोंकणी लघुपटांनी सेगीत पांच वर्सां इफ्फींत तशेंच देश विदेशांतल्या म्हत्वाच्या चित्रपट महोत्सवांत सुवात आनी इनामां मेळयल्यांत.
अंदूं निवड जाल्ल्या ‘घर’च्या निमतान लघुपटाचे लेखक- दिग्दर्शक किशोर अर्जुन हांणी सांगलें, सहितच्या वतीन आमी जे वेगवेगळे प्रयोग साहित्य- चित्रपट आनी कला मळार करतात, ताका प्रेक्षकांनी सदांच उर्बा दिल्या. ताका लागून दर वर्सा प्रमाण अंदूं लेगीत ‘घर’ इफ्फींत जाल्ली निवड आमकां सगल्यांक उर्बा दिवपी आनी कोंकणी सिनेमां खातीर अजीन नवें कितें तरी ठोस करपाक उर्जा दिवपी थारल्या. हे निवडी खातीर ईएसजी, इफ्फी आनी गोवन सिनेमा विभागाचे परिक्षक हांचे आमी उपकारी आसात. ‘घर’ लघुपटा वरवीं आमी म्हत्वाचो विशय घेवन येतात. आमकां विस्वास आसा, आमचो हो यत्न प्रेक्षकांक निश्चीत आवडटलो.
‘घर’ लघुपटांत नामनेचे कलाकार गौरी कामत, रोहीत खांडेकार, रावी किशोर आनी बाल कलाकार शार्दूल बोरकार, विकास कासलीवाल हांणी भुमिका केल्या. माधुरी अशीरगडे आनी किशोर अर्जुन हांणी कथा बरयल्या. जाल्यार रवींद्र येमपाडा हांणी सिनेमॅटोग्राफी केल्या. सिंधुराज कामत हांणी पार्श्वसंगीत दिल्ल्या ह्या कोंकणी लघुपटाचें शुटींग मडगांव, फोंडें आनी पणजी शारांत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
