भांगरभूंय | प्रतिनिधी
आपल्या घरच्यांक सदांच आपल्या धाकान दवरलें. मोठ्ठ्यान आड्डून भंय घालो. केन्नाच तांकां मेकळीक आनी स्वातंत्र दिलेना. ताची बायल, भुरगीं ताका भितालीं. आनी एक दीस….
इंग्लीशीन फॅमिली, मराठीन कुटुंब आनी कोंकणीन घराबो म्हणटात. घराबो म्हळ्यार आई, बाबा, ताई, दादा, आत्या, काका, आजी, आजो सगळीं मेळून एकठांय रावतात तो घराबो. एकामेकांक मान दिवन एकामेकांच्या हाताक धरून सुखान दुख्खान सांगात दिवपी घराबो. पयलींच्या तेंपार व्हडलो घराबो आसतालो. पूण आतां तो ल्हान जायत गेला. सगळ्यांनी आपलें नवें बिराड, नवो संवसार मांडलो. नातरा आपल्या आजी, आज्या कडल्यान तोखणाय करून घेवपाक पयस जायत गेल्यात. सगळ्यांक आपलें स्वातंत्र्य जाय. कर्तव्याच्यो बेडयो घालून कोण झरतलो? जाण्टी आपल्या घराचे एके कुडीन वेगळें रांदून जेवतात. आवय- बापायचें वजें जावंक लागलें. सगळ्यांक पयशे जाय. पयशे जोडूंक भायर गेल्लीं भुरगीं, भायरूच लग्न जावन रावतात. जाण्ंटी पिकिल्ल्या केसांच्या आवयक “म्हजी आवय ती” म्हणपाक भुरग्यांक लज दिसुंक लागली.
अशीच एक बापायची धुव हांवें पळयल्या. तिचो बापुय जाण्टो, तो गाडयेन भाडीं मारतालो. आठवे, णववे यत्तेन आसतलें तें. बापायक स्कुलान भितर आफयनासलें. ताका लज दिसताली, आपलो बापुय तो म्हणून सांगूक. कोणेंय विचारल्यार तो आपलो काका म्हूण सांगतालें. पुण बापुय तो बापुय आसता. ताणें खूब कश्ट करून आपले चलयेक दोतोर केलें. हें चली धुव म्हणचे लायकीचे आसा व्हय?
असोच एक बापुय. ताका पार्ट्यो करुंक आवडटाल्यो. ताका इश्टा वांगडा भोंवडेक वचप, पिकनिको करप हातूनच आपलें सुखशें दिसतालें. आपल्या बायल, भुरग्यां वांगडा भोवप ताका आवडनासलें. पार्टी करूक इश्ट, मौज मजा करूंक इश्ट, पिकनिको करूक इश्ट. मोबायल हातान धरुन सकाळीं फुडें इश्टांक गुडमाॅर्नींग म्हणीत- म्हणीत रातचो न्हिदतना गुडनायट म्हणीत न्हिदतालो. आपल्या कुटुंबा परस चड महत्व ताणें इश्टांक दिलें. आपल्या घरच्यांक सदांच आपल्या धाकान दवरलें. मोठ्ठ्यान आड्डून भंय घालो. केन्नाच तांकां मेकळीक आनी स्वातंत्र दिलेना. ताची बायल, भुरगीं ताका भितालीं. आनी एक दीस तो दुयेंत पडलो. हळूहळू ताच्या इश्टांची रांक उणी जायत गेली. तो हाॅस्पिटलांत एडमीट जालो. ताचे इश्ट ताका मेळूंक हातान फळां घेवन गेले. पयसुल्ल्यान खबर घेवन गेले. पुण घरचीं बायल, भुरगीं ताका जेवण घेवन वतालीं. ताची सेवा करतालीं. ताका वखदा हाडून दितालीं. ताचे कपडे घरा हाडूंन उमळटाली. रातचीं ताच्या म्हऱ्यांन रावतालीं. इश्ट, लोक फकत खबर घेवक हातान फळां वा फुलांचो झेलो घेवन येताले, पूण… घरचीं जेवण घेवन येतलीं हें मनशान केन्नाच विसरूंक जायना. हें विसरना तोच खरो सुखी घराबो.
*शोभा फुलकार
7218524389
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
