भांगरभूंय | प्रतिनिधी
भांगरभूंय । प्रतिनिधी
दिवचलः पिरायेच्या 82व्या वर्साय तरणाट्याक आसचो ना तितले उमेदीन मयें- कुमारवाडो हागचे ज्येश्ठ कलाकार रमाकांत शेटकर हाणे आपल्या घराण्याची 200 वर्सा पडस चड वर्सांची मूर्ती कला सामाळून दवोरल्या. तरणाटे हे कलेचें दायज तिगोवपाक फुडें येनात हे खातीर तांणी खंत उक्यायल्या.
रमाकांत शेटकर हाणे पिरायेच्या 9व्या वर्सा सावन चिकण मातयेच्यो तरेकवार कलाकृती घडोवपाची कला आतम्सात केली. प्रतिकूल परिस्थितींत त्या वेळार ताणे ही कला आत्मसात केल्ली तेन्ना वट्ट 12 गांवाची गणपती मूर्ती तयार करून दिवपाची जापसालदारी शेटकर घराब्याचेर आशिल्ली. ह्या बारा गांवांतल्या लोकांक तांका जाय तश्यो गणपती मूर्ती, हेर देवदेवतांच्यो मूर्त्या, पणट्यो, तशेंच हेर मूर्ती तयार करून दिवच्यो पडटाल्यो. ही परंपरा शेटकर हांणी सामाळून दवोरल्या.
माती कले खातीर ताका जायते राष्ट्रीय पुरस्कार फावो जाल्यात. आमी तिगोवन दवोरल्ली ही मूर्ती कला तयार करपाची परंपरा कुमार समाजांतल्या तरणाट्यांनी तिगोवन दवोरपाक जाय अशें तांणे सांगलां. परंपरा तिगोवन दवोरपाची गरज आसली तरी अर्थीक आडमेळे आनी हेर कारणांक लागून जायत्या जाणांनी हे कले कडेन आडनदर केल्या. सरकार जरी मूर्तीकारांक अनुदान दिता तरीय हेर सुविधा उपलब्द करून दिवपाची गरज आसा अशें ताणे सांगलें.
पयली राज्यांत वेगवेगळ्या वाठारांत वचून गणपती मूर्त्या तयार करून दिवपाचें काम करताले. गोकुळ अश्टमीक गणपती मूर्ती रंगोवपाचें काम सुरू जातालें. मूर्ती तयार करून भाविकांक दिवपाची जी खोश आसतना तिचे वर्णन करपाक जायना अशें ह्या ज्येश्ठ कलाकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
