भांगरभूंय | प्रतिनिधी
पणजीः आमदारांच्यो सुचोवण्यो मांडपा खातीर घरां नियमीत करपा विशींचें विधेयक मंगळारा सभाघरांत सादर करतले, अशें आस्वासन मुख्यमंत्री डॉ. प्रमोद सावंत हांणी दिलें. हीं घरां नियमीत करपा विशींचें विधेयक खंय आसा आनी विधानसभेच्या पटलार केन्ना सादर जातलें असो प्रस्न विरोधकांनी केल्लो.
उच्च न्यायालयाच्या आदेशा प्रमाण ज्या आस्थापनांचेर कुर्हाड बसपाची आसा तांचे विशीं सभाघरांत चर्चा करपाक न्हयकार दिल्ल्यान विरोधकांनी बोवाळ घालो. सरकार हीं आस्थापनां नियमीत करपाक हें सत्रांतलें विधेयक हाडपाचें आसा. सद्या हो विशय न्याय प्रविश्ठ आशिल्ल्यान ह्या प्रस्नाक जाप दिवपाक मेळना, अशें महसूल मंत्री बाबूश मोन्सेरात हांणी सांगलें.
मात ह्या विधेयकांत नेमकें सरकारान कितें बरयलां आनी हीं घरां नियमीत करपाक कितें पावलां घेतल्यांत हाची कसलीच म्हायती ना. राज्यांत अशीर रस्त्यांचेर घरां आसात. तांणी तीं दुरुस्त केले उपरांत तांचेर चेंपण आयलां ताचें कितें? असो प्रस्न हळदोणचे आमदार कार्लुस फेरेरा हांणी केलो.
हे विशीं विधेयक मांडले उपरांत चर्चा करपाची सुचोवणी मुख्यमंत्र्यान दिली. मात विरोधी पक्ष फुडारी युरी आलेमाव हांणी सांगलें, विधेयकांत कितें मुद्दे मांडल्यात तें आमकां खबर नाशिल्ल्यान विधेयक सभाघरा मुखार सादर करपाची मागणी केली.
सरकारान खर्यांनीच हीं घरां नियमीत करपा खातीर विधेयक हाडलां. ह्याच सत्रांत तें अधिवेशन येतलें काय असो आमकां दुबाव आसा, असो आरोप आलेमांव हांणी केलो. बोवाळ जाले उपरांत हें विधेयकाची म्हायती सगल्या आमदारां मेरेन पावची म्हण मंगळारा हें विधेयक विधानसभेच्या पटलार सादर करपाचे आस्वासन मुख्यमंत्र्यान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
