भांगरभूंय | प्रतिनिधी
-‘हॅल्लो गोंयकार’ कार्यावळींत मुख्यमंत्र्यांची हमी; बेगिनूच येवजणेची अंमलबजावणीपणजीः स्वताचीं घरां नाशिल्ल्या गोंयकारांक 10 ते 15 लाखां मदीं फ्लॅट दिवपाचे येवजणेचेर राज्य सरकार काम करता. ही येवजण बेगोबेग चालीक लावपाची हमी मुख्यमंत्री डॉ. प्रमोद सावंत हांणी शुक्रारा ‘हॅलो गोंयकार’ कार्यावळींत उलयतना दिली.
गोंयांत जमनी संबंदीत जायते प्रस्न आसात. अजुनूय जायते गोंयकार भाटकारांच्या जमनींत रावतात. तांचे कुटुंब वाडलां. पूण, तांकां निवासी जमनीचेर फकत तीनशें चौखण मिटर जमनीचो हक्क आसा. अशे परिस्थितींत विस्तारीत कुटुंबाक घर बांदपाक वा घराचो आकार वाडोवपाक भाटकारां कडल्यान परवानगी मेळना. ताका लागून जायतीं कुटुंबां शारांनी स्थलांतरीत जातात. हाचेर उपाय काडपाक ज्या गोंयकारां कडेन स्वताचें घर ना तांकां गृह निर्माण तशेंच महसूल खात्याच्या जमनींत फ्लॅट बांदतले आनी फकत धा ते पंदरा लाखांनी गोंयकारांक दितले. सध्या सरकार हे संबंदी येवजणेचेर काम करीत आसा. पूण ही येवजण बेगीन चालीक लावन फुडल्या दोन वर्सांत स्वताचीं घरां नाशिल्ल्या सगल्या गोंयकारांक फ्लॅट दितले अशें मुख्यमंत्री डॉ. सावंत हांणी म्हणलें.
रस्तो कंत्राटदार, अभियंत्या विशीं मुख्यमंत्री म्हणटात …
– गटाराचें काम तशेंच भितरले केबल घालपा खातीर राज्यांतले कांय रस्ते खणल्यात. पावसाळ्या मेरेन कामां पुराय जावंक नाशिल्ल्यान रस्त्याचेर व्हड फोंडकुलां पडल्यात.
– कांय कंत्राटदार, अभियंत्यांनी रस्त्याच्या कामांत भानगड केल्या. देखून ते रस्ते पावसाळ्यांत व्हांवून गेले. अशा आड कारवाय जातली अशें आमी पयलींच सांगलां. आमचे कडेन ठोस पुरावे नाशिल्ले. आतां मेरेन तांचे आड कसलीच कारवाय जावंक ना. पूण, अशा रस्त्यांचें ऑडीट केले उपरांत आमकां हे संबंदी अहवाल मेळ्ळा. ह्या अहवालाचो अभ्यास केले उपरांत रस्त्याचें काम चुकीचें केल्ल्या कंत्राटदार आनी अभियंत्यांचेर निश्चीत कारवाय जातली.
– निविदा दिल्लो कंत्राटदार रस्त्याचें काम केले उपरांत रस्त्याची जापसालदारकी ताचेर उरतली. सध्या पावसाक लागून ज्या रस्त्यांचें लुकसाण जालां तांचीं कामां, ते ते कंत्राटदार करतले.
रोडरोमीयोंचेर जातली कारवाय
धांवत्या बशींत बायलांची छेड काडपाचे प्रकार राज्यांत वाडपाक लागल्यात. ताका लागून बशिंत पिंक फोर्सांतल्यो बायलां पुलिसांची नेमणूक करपाची मागणी एका नागरिकान मुख्यमंत्री डॉ. सावंत हांचे कडेन केल्ली, ताचेर कांय शाळां आनी बशिंत निश्चीत करून थंय पिंक फोर्सांतल्यो बायलां पुलिसांची नेमणूक करून रोडरोमियांचेर खर कारवाय करतले, अशें मुख्यमंत्र्यांनी सांगलें. राज्यांतल्या बायलांच्या सुरक्षेची जापसालदारकी राज्य सरकाराची आशिल्ल्याचे तांणी नमूद केले.
गोंयचीं उत्पादनां विकपा खातीर अॅमेझॉन कडेन कबलात
गोंयांत अन्न आनी सामुग्री विकपा खातीर राज्य सरकारान ई-मार्केट सुरू केला. गणेश चतुर्थी आनी हेर उत्सवांनी हो बाजार उक्तो आसता. थळाव्या लोकांचोय ताका आपोआप प्रतिसाद मेळपाक लागला. ग्रामीण उदरगत वा नियोजन, सांख्यिकी आनी मूल्यमापन खातें अॅमेझॉना कडेन कबलात करून देशभरांत ही सामग्री पावोवपा खातीर कबलात करतले अशें मुख्यमंत्र्यांनी सांगलें.
मुख्यमंत्री हेल्पलायन; आतां मेरेन 527 प्रस्न
15 ऑगस्टा सावन सरकारान सुरू केल्ल्या मुख्यमंत्री हेल्पलायनीक थळाव्या लोकांचो व्हड प्रतिसाद मेळपाक लागला. आतां मेरेन फकत सात खात्यां संबंदीं मुख्यमंत्र्याच्या हेल्पलायन क्रमांकाचेर 527 प्रस्न आयल्यात. तातूंतले 424 प्रस्न सोडयले. देखून 86 प्रस्न सोडोवपाची प्रक्रिया चालू आसा अशीय म्हायती मुख्यमंत्र्यांनी दिली.
हिंसक जातीच्या सुण्यांचेर बंदी घालपाचो विचार
राज्य सरकार कायद्यांत दुरुस्ती करून पिटबूल, रॉटवेलर, जर्मन शेफर्ड आदी सुण्यांच्या आक्रमक जातींचेर बंदी घालपाचो विचार करता. तशेंच सध्या ह्या जातीचे सुणे आशिल्ल्यांक तांची नोंदणी करची पडटली आनी तांच्या सुण्यांनी नागरिकांचेर हल्लो केल्यार धनयांक ही जापसालदारकी स्विकारची पडटली अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
