भांगरभूंय | प्रतिनिधी
पणजी : कोमुनिदाद जमिनींतलीं घरां तशेंच बांदकामां अधिकृत करपा विशीं राज्यांतल्या २ कोमुनिदादिनी आमसभा आपयल्या. थिवी आनी आसगांव कोमुनिदादीची आमसभा २८ सप्टेंबर दिसा जातली.
कोमुनिदाद जमिनींतली अनधिकृत घरां वा अनधिकृत बांधकामां अधिकृत जाले उपरांत कसले परिणाम जातले, हाचेर वांगड्यां मदीं विचार करतले, अशें जारी केल्ले नोटीशींत म्हणलां.
कोमुनिदाद जमिनींतलीं २८ फेब्रुवारी २०१४ आदलीं अनधिकृत घरां वा बांधकामां अधिकृत करपा खातीर सरकारान कोमुनिदाद कोडांत दुरुस्ती करपी विधेयक संमत केलें. ह्या विधेयकाक कॉंग्रेस सयत हेर विरोधी पक्षांनी खर विरोध केलो. तरी सरकारान हें विधेयक संमत केलें. विधेयकाक मान्यताय दिवची न्हय, अशी मागणी कोमुनिदाद समितीच्या वांगड्यांनी राज्यपालांकडेन केल्ली. राज्यपाल पुसापती अशोक गजपती राजू हांची भेट घेवन तांकां कोमुनीदादिनी निवेदनूय दिल्लें. निवेदन दिले उपरांत राज्यपालांनी विधेयकाक मान्यताय दिली. हाका लागून कोमुनिदाद जमिनींतलीं अनधिकृत घरां अधिकृत करपी कायदो अस्तित्वांत आयला. कांय कोमुनिदादिनी ह्या कायद्याक फाटबळूय दिलां. हेच फाटभूंयेर थिवी आनी आसगांव कोमुनिदादिंचे आमसभेंत खंयचो निर्णय जाता, हाचे कडेन सगल्यांचें लक्ष आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
