भांगरभूंय | प्रतिनिधी
चिखली आनी चिकोळणें कोमुनिदादीची म्हायती
भांगरभूंय । प्रतिनिधी
मुरगांव : गोंयांतल्या कोमुनिदादीच्या जमनीं वयलीं घरां अधिकृत करपाच्या गोंय सरकाराच्या प्रस्तावाक चिखली कोमुनिदाद आनी चिकोळणें कोमुनिदादीन तेंको दिला.
सरकारान कोमुनिदाद जमनी वयल्या घरांक मान्यताय दिवपी प्रस्तावा आदीं चिखली आनी चिकोळणे कोमुनिदादचे साबार बसकेंत 2014 आदींचीं घरां नियमीत करपाचो थाराव मंजूर केल्लो. आमी गोंय सकाराच्या निर्णयाक येवकार दितात. कोमुनिदाद जमनी वयलीं घरां नियमीत करचे खातीर सध्या जमनीचें जें बाजार मोल आसा, तें आमकां मेळ्ळें जाल्यार चिखली आनी चिकोळणें कोमुनिदादीक कोटींनी रुपयांचो महसूल मेळटलो, अशें चिखली कोमुनिदादीचे अॅटर्नी मान्युएल डायस, चिकोळणें कोमुनिदादीची अध्यक्ष एश्टर शंखवाळकार, भांडारी उमेश शिंदे, अॅटनी महेंद्र साळकर हांणी पत्रकार परिशदेंत सांगलें.
पावसाळी अधिवेशनांत सरकारी जमनीं वयलीं आनी कोमुनिदाद जमनीं वयलीं घरां नियमीत करपाच्या प्रस्तावाक मंजुरी दिल्ल्यान कोमुनिदाद जमनीचेर घरां बांदिल्ल्यांक थाकाय मेळ्ळ्या. चिखली आनी चिकोळणें कोमुनिदादीन 2014 चे साबार बसकेंत कोमुनिदादीचे जमनीर आशिल्लीं घरां नियमीत करपाच्या प्रस्तावाक एकमतान मंजुरी दिल्ली. ते उपरांत तो प्रस्ताव सरकार दरबारांत धाडिल्लो, अशें डायस हांणी सांगलें.
एश्टर शंखवाळकार हांणी सांगलें, चिखली आनी चिकोळणें कोमुनिदाद जमनींचेर 40 वर्सां आदलीं घरां आसात, तीं नियमीत करपाची गरज आसा. पूण कांय तंत्रीक कारणांक लागून तीं नियमीत करपाक मेळनाशिल्लें. सरकारान कोमुनिदाद जमनीं वयलीं घरां कायदेशीर करपी प्रस्ताव मंजूर करून एके तरेन त्या घरधनयांक थाकाय मेळ्ळ्या. पूण सरकारान कांय नेम कोमुनिदादी वतीन मंजूर करच्यो. तातूंत 2014 आदलीं घरां नियींत करचे खातीर सध्याचें बाजार मोल दिवचें, अशी मागणी चिखली आनी चिकोळणे कोमुनिदादीच्या कार्यकारी मंडळांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
