भांगरभूंय | प्रतिनिधी
पणजीः गोंयांतल्या दिव्यांग व्यक्ती विशीं अचूक म्हायती मेळोवपा खातीर दिव्यांग सबळीकरण खातें राज्यांत दिव्यांग आशिल्ल्यांचें व्यापक सर्वेक्षण करतलें. दिव्यांग आशिल्ल्या व्यक्तींच्या हक्क कायदो 2016 प्रमाण हें सर्वेक्षण करतले. राज्यांतल्या दरेका घरांत जावपी ह्या सर्वेक्षणांत कायद्यांत उल्लेख केल्ल्या 21 प्रकारच्या दिव्यांगांची म्हायती एकठांय जातली. सर्वेक्षणांतल्यान मेळिल्ले म्हायतीचो अभ्यास करून दिव्यांग आशिल्ल्या व्यक्तीं खातीर बरे समाजीक उपक्रम चालीक लावपाचो खात्याचो हेत आसा. चार म्हयन्यांनी हें काम पुराय जातलें.
ह्या सर्वेक्षणा खातीर सॉफ्टवेअर तयार करपा खातीर खात्यान हालीं निविदा जारी केल्या. बोली जिखप्याक घरांघरांनी वचून सर्वेक्षण करचें पडटलें. हे खातीर खातें मनीसबळ दितलें. पूण ह्या कामाचेर जिखपी बोलीदाराक देखरेख करची पडटली. ह्या सॉफ्टवॅर प्रणालींत नियंत्रण दवरपाची तांक, म्हायतीची सोंपी पद्दत, भोवभाशीक पर्याय आनी सरकारी डेटाबेसां कडेन एकठांय करपाची तांक आसूंक जाय. ही पद्दत राज्यांतल्या सगळ्या दिव्यांग आशिल्ल्यांक जिओ टॅगिंग करतली. ह्या सर्वेक्षणांतल्यान खात्याक दिव्यांग आशिल्ल्या लोकां विशीं चड अचूक म्हायती मेळटली. हे म्हायतीचेर आदारीत सेवा दिवप आनी धोरणां तयार करप सोंपें जातलें. दिव्यांग आशिल्ल्या मनशाचें नांव, पिराय, मोबायल क्रमांक, आधार क्रमांक, दिव्यांग प्रकार, खंयच्यो लस घेतल्यात, दिव्यांगाचें कारण, नोकरी वा रोजगाराची म्हायती, खंयच्या सरकारी येवजणेचो फायदो घेतात अशी वेगवेगळी म्हायती सर्वेक्षणांत एकठांय करतले. हे खातीर वापरिल्ली सॉफ्टवेअर प्रणाली मोबायल तशेंच हेर वेब आदारीत साधनांचेर वापरूं येता. ही पद्दत सर्वेक्षणाची प्रगती पळयतली, तातूंत पुराय वा प्रलंबीत आशिल्ल्या कामांचो आसपाव आसतलो. सरकारी कर्मचाऱ्यांक रियल टाईमांत अहवाल दिवपाक मेळटलो. सर्वेक्षण वा म्हायती अपूर्ण आसल्यार प्रणाली तुमकां सावधान करतली. ही वेवस्था दिव्यांग आशिल्ल्या लोकांक मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
