भांगरभूंय | प्रतिनिधी
अहेर हाडचो न्हय अशें होंवळिकेंत सांगून घरचीं अहेर हाडटात, चडशे मोलादीक. एकाच सारके आसल्यार ते दितल्यांकय कुशीक काडचेच पडटा. घरचे अहेर दिवपी सरकाराक त्रासांत उडोवपी? कितलो जांच कोण करतले? खंय लुकसाण जातलें? हें चिंतप बरें.
कला आनी संस्कृती मंत्री गोविंद गावडे हांचे कडेन अदीं मदीं उलोवप जाता. नाकार राग आशिल्लें तांचें व्यक्तीत्व पिडेस्त समाजांतल्यान जल्मल्लें. समाजांतल्यो भाव भयणी एकठांय जातात तेन्ना तांकांय आपूण, आपलें सरकार समाजा पासत खंय तरी उणें पडटा हें होलमलां आसुये. तातूंतल्यान
तिडक उक्तावप जालें. ते आदिवासी समाजाचे एक तरणाटे फुडारी, भाशणाची कला, कौशल्यां आशिल्ले. उच्चांकांक्षा तांकां नासतली व्हय?
मुख्यमंत्री डाॅ. प्रमोद सावंत हांचे कडेन उलोवन आदिवासी भावांचे कांय प्रस्नय तांणी आतां मेरेन सुटावे केल्यात आसतले. गोंय राज्योत्सवाचे कार्यावळींत दोगांयनी शेकहँडय केलें, माचयेरय बसले. माचयेर गोविंदबाब आनी कोयर वेवस्थापन मंत्री बाबुश मोंसेरात उलयले. दुसरे दिसा बाबुश टॅक्सी अॅप प्रस्ना वेल्यान तापले. दुसरे वटेन उदका स्त्रोत मंत्री सुभाष शिरोडकार शेतकामती मंत्री रवीबाब नायक हांचेर तिडकले.
आरोपांच्या कातरेंतली कला अकादमीतली कार्यावळ घरचे अहेर (देणें) दिवपी नासली, एकवटाचो रकाद धाडपी. उपरांत अहेर मेळ्ळे ते घरचेच. घरचे अहेर फाटलीं तीन वर्सां सरकाराक मेळत आसात, विधानसभेंत, विधानसभे भायरय. घरचे अहेर विधानसभा वेंचणूक लागीं येता तशे वाडटले. खंयचे घेवप, काडून दुसऱ्याक दिवप तें मुख्यमंत्री थारायतले. मुख्यमंत्र्यांक समाजाचीं गणितां बरीं कळटात, बारीक आनी उंचेल्या. निश्चेवान निमाणे फुडें वतना तांकां निर्णय घेवचो पडटलो. घरचे अहेर कितले, कितलीं वर्सां सांबाळप तें बेगीन थारायल्यार 2027 त 27 भाजपाक मेळटले.
अहेर हाडचो न्हय अशें होंवळिकेंत सांगून घरचीं अहेर हाडटात, चडशे मोलादीक. एकाच सारके आसल्यार ते दितल्यांकय कुशीक काडचेच पडटा. घरचे अहेर दिवपी सरकाराक त्रासांत उडोवपी? कितलो जांच कोण करतले? खंय लुकसाण जातलें? हें चिंतप बरें.
केन्ना केन्ना घरचे देणें म्हारग पडूं येता. विचार केल्यार आतां मेरेन चड अहेर दिवपी घरांतले श्री. गावडे हांचे भायर आनीक कोण आसात तांचोय सोद लागतलो. मोपा विमानतळाक खेपपी सरकारांतले आतां मोपा नाशिल्लो जाल्यार कितें जावपाचें ताचो हिशोब करूंक लागल्यात. भावा-भयणींच्यो, सोयऱ्यांच्यो मोपा लागसरच्यो जमनी गोंया भायल्यांक विकपी सरकारांत आसात व्हय?
आयज याद जाता भाजपाचे ज्येश्ठ फुडारी आदले खेळां मंत्री डाॅ. विल्फ्रेड मिस्किता हांची. डाॅ. मिस्किता आसल्यार दाबोळे टॅक्सी बे लागसारचे भुंयेंची काणी सांगपाचे. भूंय सरकाराची, कोणे घेतली, कोणे विकली तें तांकां खबरआशिल्लें. ताणी थोडो तेंप रेवेन्यू खातें सांबाळिल्लें, समाजीक यंत्रणांक ते लागींचे. रेवेन्यू खातें आतां सांबाळपी मोंसेरात हांकां येरादारी खात्यांतलीं गुपितां कळ्ळ्यांत, गोंयांत येवपाक सोदपी ओला, उबेर तांचे म्हऱ्यांत पाविल्ले नासत व्हय? टॅक्सी वेवसायिकांक ते वळखतात, तांचे तिडकींतय अर्थ आसा.
माॅन्सून बेगीन आयिल्ल्यान रोंपां वांटलीं, शेतकारांक आदले लुकसाणेचे पयशे मेळनात म्हणून शिरोडकार तिडकले ते आतांच कित्याक? फोंडे म्हालांतले तें झगडें आसत पूण समाजांतल्या तंट्यांचेर, पदांचेर तांचें लक्ष आसतलेंच.
बोवाळांत भलायकी, रानां मंत्री विश्वजीत राणे मुख्यमंत्र्यां कडेन उलोवंक शिकल्यात. राज्याचे उदरगती पासत घरचे अहेर दिवप घेवप आसता. समाजाचे उदरगती पासत तें आसत जाल्यार अहेर एकामेकां मुखार, वांगडा बसून उलयतनाय दिवं येतात.
प्रदेश भाजपा, सरकारांत अणभवी नेतृत्व आसा. गोविंदबाबांच्या उतरांनी तांच्या मतदारसंघांतले, समाजांतले एकवटाची भास उलोवंक लागल्यात. सरकार, समाजाच्या राजकारणांत विरोधक, दुसऱ्या समाजान कित्याक पडप? निमाणें तेंय राजकारणच.
कालचें गोंय, कालचो देश आयज उरूंक ना. उदरगती बराबरीन शिक्षण आनी हेर मळांनी जावपी बदलांचो आवाज वेगीं संवसारांत पावता. वातावरण बदलता तशें वाऱ्या पावसा बराबर व्हांवन, धांवन वचपी राजकारणांत बदलाचे रंग हाडटले अशें न्हय. तांचीय पिराय आड येता, केंद्र सरकारांतय भाजपा कडेन मुखेल खातीं आसात हाची जाणविकाय तांकां आसा. घरचे अहेर दिवप्यांकय एकठांय रावल्यार राखण मेळटली, रोखडेच खात्यांत बदलय जातले अशें मंत्र्यांक कळ्ळां व्हय?
कांय म्हत्वाचीं खातीं मुख्यमंत्र्यां कडेन आसात, तेभायर ल्हान खातींय. उदका पुरवण हें नवें खातें जावपाचें आसा. म्हत्वाच्या व्हड खात्याचें कामकाज दुपेटीन तिपेटीन वाडलां. तीं सांबाळटना ल्हान खात्यां कडेन आडनदर जाता. ते नदरेंतल्यान आपल्या तशेंच मंत्र्यांच्या खात्यांचो नियाळ करून. तांचे कडेन उलोवन खातें बदल बेगीन जावचो.
पावसांतले विधानसभा अधिवेशन लागीं आयलां. सगल्यांत चड तेंपाच्या त्या अधिवेशना खातीर मंत्र्यांक अभ्यासय करचो पडटा. मंत्र्यांची मुखेल खातीं तशींच दवरून हेर बदल्लीं, दोन नवे मंत्री घेतले जाल्यार 2025 वर्स अखेर मेरेन केल्ल्यो घोशणा चालीक लागतल्यो. कांय येवजण्यांचीं नवी बांदावळ केंद्र सरकाराचे येवजणे प्रमाण करपाची गरज आसा. तें करपा पासत कुशळ मनीसबळ खात्यांनी उणें आसतलें. निवृत्ती उपरांत सेवेंत वाड दिल्ल्या अधिकाऱ्यांकय नाल्ल दिवपाक सरकारान सुरवात केल्या. सेवेंत वाड मेळ्ळी तरी कांय मुखेल निर्णय घेवपाक तांकां आडमेळीं येतात हें मुख्यमंत्र्यांक कळ्ळां. निमाणें कायदे, नेमावळी आसात त्यो पाळच्योच पडटात. केंद्र सरकारान शिटकावणी दिल्ल्यान उंचेल्या पावड्यां वले दोन सचीव वतले हाचो अदमास मुख्यमंत्र्यांक आयला. तातूंतल्यान स्मार्ट सिटी कंपनीचेर दुसरे आयएएस अधिकारी आयल्यात. हेर आयएएस अधिकारी आॅगस्ट मेरेन बदलतले हातूंत दुबाव ना.
कोणांक मंत्रीमंडळांत घेवप, काडप हो मुख्यमंत्र्यांचो अधिकार. खातीं बदलतना अणभव, शिक्षण पळोवप बरें.
सुहासिनी प्रभुगांवकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
