घरचे आहेर घेवचेच

भांगरभूंय | प्रतिनिधी

पत्रभूंय

डाॅ. प्रमोद सावंत

मानादिक मुख्यमंत्री,

 विधानसभा अधिवेशनाच्या पयल्याच दिसा सरकाराक घराब्यांतल्यान आहेर व्हडा प्रमाणात येवंक लागल्यात. घरचे आहेर घेवचेच हें आयज लग्ना वेळार घराबे थारयतात. घरचे आहेर (देणे) दिवपा घेवपांतय आपलेंपण आसता. तातूंत फकत आपल्या मतदारसंघाची न्हय गोंयची उदरगत जावची ही  मोख आसल्यार आहेर घेवचेच.

 हेडगीं गोरवां, चाबपी सुणे, माजरां पाळपी- हाडप्यांचेर बंदीच्या विधेयकाची गरज आसा. गोंयांत निराधारांनी येवजणींचो लाव घेतिल्ल्यांचो सरकारान अभ्यास केला. तातूंत गब्बर दिसले? राज्य, देस, विदेसांत चार- चार फ्लॅट, घरां आसपी उणे नात. तांकां आडावंक येता? संवसारीकरणांतल्यान (ग्लोबलायजेशन), सरकारी आदारान गब्बर (शोले न्हय पयशांनी) जावपी आमदार सरकारांत, विरोधी पक्षांत आसतले. ते आमदार सरकाराक तेंको दिवंक मुखार सरतात हें बरें. सादूर जायात. 2027 त 27 चें सरकार, बरें प्रशासन मेळचें हे खातीर बांदावळ, प्रशिक्षणाक आरंभ केला. त्या प्रशिक्षणाचो लाव घेवन राजकारणी घडटले. गोंयांत एक हजार लखपती दीदी घडोवंक केल्ले यत्न फळादीक जातले अशी आस्त बाळगीतां. 

स्वयंपूर्णेतल्यान अन्नपूर्णा घडोवपाच्या संकल्पांतल्यान ताज्जें, सवाय, भलायकेक बरें अन्न समेस्तांक मेळूंक शकता. कुशळ इंजिनियर घडोवपाक, जेईई खातीर विद्यार्थ्यांक जागोवपाक तंत्रीक शिक्षण संचालनालयांत मात्सो बदल करात.

फकांडां करपी हजार आसतले, अचूक सुचोवण्यो करपी 10 – 15 आमदार,  गुणेस्त 8 मंत्रीय आसात. गुणेस्तांकडे फकत शिक्षणच न्हय कश्ट करपाची तांक आसा. रात दीस आपल्या मतदारसंघांत वावुरतना देस पावंड्यार अणभव घेवन आयिल्ल्या गोंयकार अधिकाऱ्यांचो लाव घेवचो. गोंयांत लीप चोरयां येवन धर्मांतर करतल्यांक सोदून काडिल्ल्या पुलिसांक शाबासकी सरकारान दिवचीच पडटली. 

गोंयची आवयभास एकूच, ती म्हणल्यार कोंकणी. आवयभासेंन उलयात, बरयात, शिकयात हें सांगत रावात. दुसऱ्या भासांक गोंयांत राजभासेचो पावंडो आतां कित्याक जाय? भास हें संपर्काचें साधन. राजभाशेच्या प्रस्ना परस गोंयांक जांच करपी अरिश्टां वाडटात. तांचेर उपाय करपाक सरकार मुखार सरलां. कायदे बरे जातात, ते चालीक लागचे हे खातीर सरकाराक चड लक्ष घालचें पडटलें. देव बरें करुं. 

सुहासिनी प्रभुगांवकार