भांगरभूंय | प्रतिनिधी
फोंडें: भोम अडकोण पंचायत वाठारांतल्या नायकवाड्यार भाड्याचे कुडींत रावपी त्योफील सक्षय लकारा (43, मूळ झारखंड) हाणें शुक्रारा राती आपली घरकान्न मेलो लकारा (48) हिचो गळो आवळून खून केल्ल्या प्रकरणांत फोंडें पुलिसांनी ताका अटक केली. दुबावितान घरकान्नीचो खून केले उपरांत हें प्रकरण लिपोवचे खातीर खाजगी दोतोरा कडल्यान मरणाचो दाखलो मेळोवपाचो यत्न अज्ञातांनी 108 अॅम्ब्युलन्सीक खबर दिल्ल्यान फसलो. घोवा बायलेक दोगांकूय सोऱ्याचें व्यसन आशिल्लें. घडणूक घडली ते रातीं दोगांय सोऱ्याचे घुंवळेंत आशिल्लीं.
मेळिल्ले म्हायती प्रमाण शुक्रारा राती घोव बायल दोगांय सोऱ्याचे घुंवळेंत आशिल्ली. भाड्याचे कुडींत रावपी जोडपें सद्दां रातीं कडेन सोऱ्याचे घुंवळेंत एकामेकां कडेन झगडटालें. फाटल्या कांय दिसां सावन दोगांचींय झगडीं चलतालीं. घोव गवंडो जाल्यार बायल पोरण्या गोंया घरांतलें काम करताली. शुक्रारा राती 9.30 वरां मेरेन दोगांचींय झगडीं जालीं. घोवान पयलीं बायलेचे चार दांत मोडून उडयले. ती जमनीचेर पडले उपरांत तिचो गळो आवुळ्ळो. शेनवारा सकाळीं कूड कुडी भायर दवरून घरकार आपले घरकान्नीचो मरणाचो दाखलो मेळोवपा खातीर खूबशा खाजगी दोतोरां कडेन गेलो. पूण एकाय दोतोरान ताका मरणाचो दाखलो दिवंक ना.
भाड्याक रावपी बायल कुडी भायर पडून आशिल्ल्यान अज्ञातांनी फोन करून 108 अॅम्ब्युलन्सीक फोन करून आपयली. बेतकी- खांडोळें मुळाव्या भलायकी केंद्रांत तिका व्हेवे उपरांत दोतोरांनी तिका मरण आयिल्ल्याचें घोशीत केलें. पोस्टमार्टम अहवालांत तिका गळो आवुळिल्ल्यान घुस्पटून मरण आयिल्ल्याचें स्पश्ट जालें.
फोंडें पुलीस स्टेशनाचे उपअधिक्षक आशिष शिरोडकार हांच्या मार्गदर्शना खाला निरिक्षक विजयकुमार चोडणकार हांणी घडणुकेचो पंचनामो केलो आनी ह्या खून प्रकरणांत त्योफील लकारा हाका अटक केली. पंचनामो करतना पुलिशेक कुडींत 4 दात आनी जमनीचेर पडिल्लें रगत दिसलें. ताका लागून खून करचे खातीर दुबावितान तिचे दात तोडिल्ल्याचो दुबाव आसा. फोंडें पुलीस ह्या प्रकरणांत फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
