भांगरभूंय | प्रतिनिधी
पणजीः भूतकाळांत दुख्खांत रावनासतना नवे उमेदीन आनी नवी आस्त घेवन मुखार कशें वचप ही देख ‘घर’ हो लघुपट दिता. ही काणी एका नेण्टे विधवा बायलेची आसा. पूण नवो संवसार घडोवपा खातीर तिचे मुखार एक संद उबी आसा. पूण तिणें स्वताक निर्बंध घाल्ल्या कारणान ती निर्णय घेवंक फाटीं फुडें जाता.
किशोर अर्जून हांणी दिग्दर्शीत केल्लो ‘घर’ हो 19 मिणटांचो कोंकणी लघुपट खरे घडणुकेचेर आदारीत आसा. काणयेची सुरवात राजी ह्या नेण्टे बायले सावन सुरू जाता. एका वर्सा आदीं अपघातांत तिचो घोव भायर पडिल्लो आनी ती आपलो अडेज वर्सा पिरायेचो चलो आनी सासुमांय हांचे सयत संवसार चलयता. अपघात विम्याचे पयशे आयिल्ल्यान घरची स्थिती वायट नासता. पूण राजीक आपल्या दुख्खांतल्यान भायर काडून आपले जिणेची नवी सुरवात करपाक सॅम नांवाचो भुरगो तिका मनयता. पूण स्वताचेर मर्यादा घालून आशिल्ली राजी सॅमा कडेन परतून लग्न जावपाक कासावीस जाता. दुख्खांतल्यान नव्या संवसारा कडेन पावल, ही राजीच्या निर्णया विशींची काणी आसा.
रावी जिणें राजीची भुमिका केल्या तिचो अभिनय तोखणाय करपा सारको आसा. जेन्ना ती विधवेची भुमिका निभयता तेन्ना ती भायल्यान खूश आसा पूण तिच्या काळाजांत आशिल्लें दुख्ख तिच्या चेऱ्याचे हावभाव, उलोवप, भावनेंतल्यान दिसून येतात. पूण जेन्ना नवी सुरवात करपा विशींचो ती निर्णय घेता तेन्ना तिच्या चेऱ्याचेर एक नवे तेज तयार जाता.
ह्या लघुपटाचे दिग्दर्शक किशोर अर्जून हांणी आपल्या दिग्दर्शनांतल्यान हो विशय बरो हातळ्ळा. राजीक परतून आपले कडेन लग्न जावपाक मनोवपा खातीर सॅमाचे यत्न, एक विधवा बायल तरणाट्या चल्या बरोबर भोंवता तें पळोवन समाजाची मानसीकता, तीन वर्सां पयली घोव भायर पडिल्ली सासुमांय आनी सुने मदलें संभाशण ह्या गजालींचेर सामको भर दिला.
एकंदरीत हो लघुपट विधवेच्या जिण्याच्या विशयाचेर उजवाड घालता. सकारात्मक मानसीकता आशिल्ल्या लोकांक लागून विधवेची जीण कशी सोंपी जावंक शकता हो संदेश ह्या लघुपटांतल्यान दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
