भांगरभूंय | प्रतिनिधी
भांगरभूंय I प्रतिनिधी
मडगांवः नगराध्यक्षपदार निवड जाले उपरांत सात दिसांत मडगांव पालिकेचे नगराध्यक्ष घनश्याम शिरोडकार हांणी राजिनामो दिला. घनश्याम शिरोडकार 16 सप्टेंबराक लोकशाय पद्दतीन नगराध्यक्ष जाल्ले. उपरांत भाजपाच्या नगरसेवकांनी अविश्वास थाराव दाखल केल्ल्यान आपूण पदाचो राजिनामो दिल्ल्याचे तांणी सांगलें.
आपणाचेर 19 सप्टेंबराक अविश्वास थाराव दाखल केल्लो. अविश्वास थारावाचेर चर्चा करपा खातीर 23 सप्टेंबराक बसका जावपाची आसली. ताचें पयलीच शिरोडकार हांणी आपल्या पदाचो राजिनामो दिलाे. 16 सप्टेंबराक आपुण लोकशाय पद्दतीनन 15 मतांनी वेंचून आयिल्लो.
ते उपरांत 3 वरांत नगरसेवकांक मुख्यमंत्री डॉ. प्रमोद सावंत हाणी बंगल्याचेर आपोवन व्हेले आनी अविश्वास थारावाचेर 14 नगरसेवकांच्यो सयो घेतल्यो. उपरांत नगरसेवकांक जांबावलेच्या श्री दामोदराच्या देवळांत व्हरुन नाल्लाचेर हात दवरुन प्रमाण जावपाक लायले. आपणाक 15 मतां पडिल्ली. मुख्यमंत्री सावंत हांणी जर हस्तक्षेप करुंक नासलो जाल्यार 17 मतां पडपाची. अविश्वास थारावा वेळार गुपीत पद्दतीन मतदान जाल्लें जाल्यार 20 मतां पडपाचीं, अशें शिरोडकार हांणी सांगलें.
नगराध्यक्ष निवडी वेळार गुपीत पद्दतीन मतदान घेतात आनी अविश्वास थारावाचेर हात उंचावन मतदान घेतात, ही लोकशायेक धरून पद्दत न्हय. ही पद्दत बंद करपाक आपूण न्यायालयांत वतलो, अशें घनश्याम शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
