भांगरभूंय | प्रतिनिधी
धर्म ही अफूची गुळी, अशें कार्ल मार्क्सान म्हणलां. ही गजाल आयज पसून लागू जाता. धर्माक मारिल्ली वेंग मात्शी सदळ केल्यार पसून साबार प्रस्न सुट्टले. सगल्यांक खबर आसा, पूण तांकां तें करपाचें ना. धर्मांचे अनुयायी एकमेकांच्या जिवाचेर उठिल्ले पळोवपाक मेळटात. वयल्यान आमच्या धर्मग्रंथांनी तसलें कांय सांगुंकच ना, आमी कोणाचो दुस्वास करिनात अशें सांगीत भोंवतात. शिक्षणान खंय विचार प्रगल्भ जातात. मात धर्माक लागून उच्च शिक्षीत पसून अनाड्या सारके वागतात. धर्माक लागून कितें जाता, ताची जिती जिवी देश म्हणल्यार अफगाणिस्तान. थंय एका काळार चलयो मोटवे कपडे घालून काॅलेजीक वताल्यो, मात रशियेन, अमेरिकेनथंय धर्मांधांक जल दिलें आनी आयज तालिबानी राज्य करतात. धर्म सगल्यांनीच पाळचो. पूण, तो हुंबऱ्या भायर हाडलो आनी तकलेर चडोवन घेतलो काय कितें जाता तें पाकिस्ताना कडेनूय पळोवन कळटा. थंयचे उच्चभू, उच्च शिक्षीत लोक युरोपांत वचून स्थायीक जाल्यात. राजकी फुडाऱ्यांक लोकशाय पद्दतीन देश चलोवपाक दिवपाचे बदला लश्कर थंय आपलो शेक दवरूंक सोदता. तांचो आमीग आशिल्लो धर्मीक संघटनांचो गट मदींच धर्माची फोडणी मारून आपलें कितें सादता काय म्हूण पळयता. कारण तांकां दुसऱ्या धर्माचे देश मुखार गेल्ले नाकात. धर्माची धाल वापरून तांणी काश्मीरांत फाटलीं 70 वर्सा जें कितें चलयलां तें संवसाराक खबर आसा. पयर आदले प्रधानमंत्री इम्रान खानाचेर हल्लो जालो ताचे फाटल्यानूय धर्मीक कारण आसतलें.
इम्रान हो पश्चिमी विचारांचो मनीस. देखून तो धर्मीक फुडाऱ्यांच्या दोळ्यांत खुपत आयला. पाकिस्तानांतल्या राजकी मळार ताणें पावल दवरलें तेन्ना बदल जाय म्हूण वा ताच्या ग्लॅमराक भुलून लोकांनी ताका वेंचून दिलो. पाकिस्तानाची अर्थीक, समाजीक घडी जाग्यार घालपांत ताका यशूय मेळपाक लागिल्लें. इतल्यान ताणें पाकिस्तानी फुडाऱ्यांचो वश्याचो काश्मीर राग आळयलो आनी आपूणय ताचो रियाज करपाक सुरवात केली. काश्मीर हो भारताचो वेगळांव नजं असो भाग. राजा हरिसिंहान आपूण जावन तो भारतांत विलीन केल्लो, हें जगाक खबर आसतना इम्रानान मेळटा थंय आपलें हें तुणतुणें सुरूच दवरलें. वयर काश्मिरांतल्या पाकिस्तान पुरस्कृत आतंकवादा कडेनूय आडनदर केली. उपरांत न्यायालय, संसदेन इम्रानाक कदेला सयत दर्यांत बुडयलो. आतां बऱ्याच दिसांनी ताणें सत्ताधारी पक्षा आड आंदोलन चालू केलां. ताका तेंकोय मेळपाक लागला आनी अशा वेळार हो हल्लो जाला. वझिराबादाक ताचे प्रचार मिरवणुकेचेर दोगांनी हल्लो केलो. त्या फारपेटांत 10-12 लोक जखमी जाल्यात. इम्रानाच्या एका अंगरक्षकाक मरण आयलां. एका हल्लेखोराक लोकांनी जिवेशीं मारलो, तर दुसऱ्याक पुलिसांनी ताब्यांत घेतलो. इम्रानाच्या पांयाक गुळी लागली. वाटावल्लो हल्लेखोर म्हणटा, म्हाका इम्रान आवडना. तो लोकांची दिशाभूल करतालो. अजान चलतना हाचो व्हडल्या व्हडल्यान प्रचार चलतालो. (म्हणजे धर्मीक कारणा वयल्यान हल्लो?) हांव ताका जिवोच मारूंक सोदतालों.
बेनझीर भुत्तोक अशीच प्रचारा वेळार मारिल्ली. मनीस, विचार आवडूंक ना जाल्यार ताका जिवेशीं मारप आनी वयल्यान मारपा फाटलें तत्वज्ञान सांगप, ही गजाल खंयच्याच देशाक नवी न्हय. पिळग्यान पिळग्यो हो दुस्वास चलत आयला…. आनी हाचे फाटल्यान राजकी कारणा परस धर्मीक कारणां चड आसात. जाणकारांच्या मतान, पाकिस्तानांत आतां मेरेन ज्यो हत्त्या जाल्यात ताचे फाटल्यान थंयच्यो धर्मीक संघटना आनी लश्कराचो हात आसा. ह्या हल्ल्या फाटल्यान प्रधानमंत्री शेहबाज शरीफ, मंत्री राणा सनाउल्लाह आनी आयएसआयचो मेजर जनरल फैझल नसीर आसा, असो आरोप इम्रानान केला. आतां ह्या तिगांकूय काडचे हे खातीर पाकिस्तानांत निदर्शनां चालू आसात. फुडल्या वर्सा सार्वत्रिक वेंचणूक. ती अंदूंच जावची हे खातीर इम्रानाचे यत्न चल्ल्यात, असो ताच्या पाकिस्तान तेहरीक ए इन्साफ (पीटीआय) पक्षाच्या विरोधकांचो आरोप. मात, सध्या इम्रानाक ही गुळी फायद्याची थारल्या. कारण हे घडणुकेन मतदार यु – टर्न घेवन परतून इम्रानाचे वटेन आयल्यात. यादवी पेटूं येता, इतलें समाजीक वातावरण खदखदपाक लागलां. तशें लश्कराचें एकूणच राजकी मळाचेर नियंत्रण आसा. पूण, इम्रान वेंचून येवं येता, अशी परिस्थिती तयार जाल्या.
पाकिस्तान आमचे परस आकारान ल्हान, लोकसंख्येन उणो तरीय सर्वांगी उदरगतीचे बाबतींत खूब, खूब फाटीं…. आनी हाका धर्मांधताय, अतिरेकी विचारांची उरफाटी धांवपी तकली, रुढी- परंपरांच्यो बेडयो….. जापसालदार आसात, अशें म्हणल्यार तें सामकेंच चुकीचें थारचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
