भांगरभूंय | प्रतिनिधी
गोविंद गावडे: कला अकादमींत ‘पुरूष’ नाटका वेळार जाल्लो घोळ
पणजी: कला अकादमीच्या नाट्यघरांत ‘पुरूष’ नाटका वेळार घडिल्ले घडणुकेचो सविस्तर अहवाल आपणें वांगडी सचिवां कडल्यान मागयला. अहवाल मेळ्ळे उपरांत फुडलो निर्णय घेतले अशें मंत्री तशेंच कला अकादमीचे अध्यक्ष गोविंद गावडे हांणी मंगळारा पत्रकारां कडेन उलयतना सांगलें.
नामनेचे अभिनेते शरद पोंक्षे हांच्या ‘पुरूष’ नाटकाचो प्रयोग हालींच कला अकादमीच्या नाट्यघरांत जालो. पूण, नाटका वेळार पोंक्षे हांचो अभिनय सुरू आसतनाच उजवाडा येवजणेंत इबाड जालो. ताका लागून नाटक मदींच थांबोवन ‘दहा मिनिटे पडदा टाकतो आणि पुन्हा येतो’ अशें म्हणून पोंक्षे हांणी नाटक थांबयिल्लें. हे घडणुके उपरांत विरोधकांनी कला अकादमी वेल्यान परतून एकदां मंत्री गोविंद गावडे आनी सरकाराक लक्ष्य करपाक सुरवात केल्या.
हे फाटभुंयेर आपणें हे घडणुकेचो सविस्तर अहवाल वांगडी सचिवां कडल्यान मागयला. अहवाल मेळळे उपरांत फुडलो निर्णय घेतले अशें मंत्री गावडे हांणी सांगलें.
मजगतीं, कला अकादमी विशीं राज्य सरकारान स्थापन केल्ल्या कृतीदळान अजून सरकाराक आपलो अहवाल सादर केल्लो ना. पूण कामांचो नियाळ घेवन नाट्यघरांतलो सावंड, उजवाडा येवजण आनी रंगमाचये विशीं तीन सल्लागारांची नेमणूक करपाची सुचोवणी ‘पीडब्ल्यूडी’क केल्ल्यो. ते प्रमाण ‘पीडब्ल्यूडी’न सावंडा खातीर रॉजर ड्रेगो, उजवाडा येवजणे खातीर शीतल तळपदे आनी रंगमाचये खातीर राजन भिसे हांची नेमणूक केल्या. ह्या तीन सल्लागारांनी दोन फावटी नाट्यघराची पळोवणी केल्या आनी येता त्या सप्तकांत तांचे कडल्यान अहवाल मेळटलो. तांचे शिफारशीं प्रमाण नाट्यघराची कामां करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
